પહેલા અયોગ્ય રીતે સ્પર્શ કર્યો...પછી કપડાં કાઢી નાખ્યા... કોલકાતાની વધુ એક સરકારી હોસ્પિટલમાં ‘કાંડ'
એક આરોગ્ય કર્મચારીએ સરકારી હોસ્પિટલમાં સૂઈ રહેલી ૨૬ વર્ષની મહિલાની છેડતી કરી
કોલકાતા, તા.૧૬:કોલકાતાની આરજી કાર હોસ્પિટલમાં લેડી ડોક્ટર રેપ મર્ડર કેસને લઈને હોબાળો હજુ સમાપ્ત થયો નથી, ત્યારે કોલકાતાની જ એક સરકારી હોસ્પિટલમાં છેડતીની ઘટના સામે આવી છે. અહેવાલ છે કે એક આરોગ્ય કર્મચારીએ સરકારી હોસ્પિટલમાં સૂઈ રહેલી ૨૬ વર્ષની મહિલાની છેડતી કરી છે. મહિલાની ફરિયાદ મુજબ, આ ઘટના ત્યારે બની જ્યારે તે કોલકાતાની ઇન્સ્ટિટયૂટ ઑફ ચાઇલ્ડ હેલ્થ (ICH) ના બાળકોના વોર્ડમાં સૂતી હતી, જ્યાં તેના બીમાર બાળકને દાખલ કરવામાં આવ્યું હતું.
રિપોર્ટ અનુસાર, ફરિયાદમાં કહેવામાં આવ્યું છે કે આરોપીની ઓળખ તનય પાલ (૨૬) તરીકે થઈ છે, જે હોસ્પિટલમાં વોર્ડ બોય તરીકે કામ કરતો હતો. તે બાળકોના વોર્ડમાં પ્રવેશ્યો, મહિલાને અયોગ્ય રીતે સ્પર્શ કર્યો અને તેના કપડાં કાઢી નાખ્યા. ફરિયાદમાં કહેવાયું છે કે આરોપીએ આ ઘટના પોતાના મોબાઈલમાં રેકોર્ડ પણ કરી લીધી હતી.
કોલકાતાની સરકારી આરજી કાર હોસ્પિટલમાં તાલીમાર્થી ડૉક્ટર પર બળાત્કાર અને હત્યાના થોડા અઠવાડિયા પછી આ ઘટના બની હતી. આ ગુનાના સંબંધમાં બીજા દિવસે એક નાગરિક સ્વયંસેવક સંજય રોયની ધરપકડ કરવામાં આવી હતી. ઘટના અંગે ફરિયાદ મળતાં, કોલકાતા પોલીસે ભારતીય ન્યાય સંહિતા (BNS)ની સંબંધિત કલમો હેઠળ FIR નોંધી અને આરોપીની ધરપકડ કરી.
પોલીસે પાલનો મોબાઈલ ફોન પણ જપ્ત કરી લીધો હતો અને તેને ફોરેન્સિક તપાસ માટે મોકલી આપ્યો હતો. બાદમાં તેને સ્થાનિક કોર્ટમાં રજૂ કરવામાં આવ્યો, જ્યાંથી તેને પોલીસ કસ્ટડીમાં મોકલી દેવામાં આવ્યો. આ મહિનાની શરૂઆતમાં, પશ્ચિમ બંગાળના બીરભૂમ જિલ્લામાં એક સરકારી હોસ્પિટલમાં ફરજ પરની નર્સની કથિત રીતે છેડતી કરવા બદલ એક વ્યક્તિની ધરપકડ કરવામાં આવી હતી. ભારે તાવના કારણે સ્ટ્રેચર પર આરોગ્ય કેન્દ્રમાં લાવવામાં આવેલ વ્યક્તિને નર્સ સલાઈન ડ્રીપ લગાવી રહી હતી ત્યારે આ ઘટના બની હતી.
(10:29 AM IST)
છેલ્લા 8 દિવસમાં સૌથી લોકપ્રિય 
