અમદાવાદ :વડાપ્રધાન મોદીનો ગુજરાત પ્રવાસનો આજે બીજો દિવસ છે. પીએમ મોદી ત્રીજી વખત વડાપ્રધાન બન્યા બાદ પ્રથમ વખત ગુજરાતની મુલાકાતે આવ્યા છે. ગઇકાલે અમદાવાદ એરપોર્ટ પર પીએમ મોદી આવી પહોંચતા રાજ્યપાલ આચાર્ય દેવવ્રત, મુખ્યમંત્રી ભુપેન્દ્રભાઈ પટેલ અને મંત્રી જગદીશ પંચાલ દ્વારા પીએમ મોદીનું સ્વાગત કરવામાં આવ્યું હતું. હવે આજે તેઓ ગુજરાતને 8000 કરોડ રૂપિયાની ભેટ આપશે.  

ભારતની પ્રથમ વંદે મેટ્રોને ભુજથી અમદાવાદ સુધી ફ્લેગ ઓફ કરવામાં આવશે. આ ઉપરાંત તેઓ અમદાવાદમાં અન્ય અનેક વિકાસ યોજનાઓનું ઉદ્ઘાટન અને શિલાન્યાસ કરશે. પીએમ મોદી ગઈકાલે સાંજે અમદાવાદ પહોંચ્યા હતા.

પીએમ મોદી આજે અમદાવાદમાં છ વંદે ભારત ટ્રેનને લીલી ઝંડી આપશે. આ સિવાય પીએમ મોદી અમદાવાદમાં 30 મેગાવોટની સોલાર સિસ્ટમનું ઉદ્ઘાટન કરશે. પ્રધાનમંત્રી આવાસ યોજના-ગ્રામીણ હેઠળ 30 હજારથી વધુ મકાનોને મંજૂરી આપશે અને આ મકાનો માટે પ્રથમ હપ્તો જાહેર કરશે.

વંદે ભારત ટ્રેનોને લીલી ઝંડી આપશે જેમાં નાગપુરથી સિકંદરાબાદ,કોલ્હાપુરથી પુણે,આગ્રા કેન્ટથી બનારસ,દુર્ગ થી વિશાખાપટ્ટનમ,પુણેથી હુબલી,વારાણસીથી દિલ્હી

પીએમ મોદી કચ્છ લિગ્નાઈટ થર્મલ પાવર સ્ટેશન, કચ્છમાં 35 મેગાવોટ BESS સોલર પીવી પ્રોજેક્ટ અને મોરબી અને રાજકોટમાં 220 કિલોવોલ્ટ સબસ્ટેશનનું પણ ઉદ્ઘાટન કરશે. તે જ સમયે પીએમ મોદી ગાંધીનગરમાં રી-ઈન્વેસ્ટ 2024ની ચોથી આવૃત્તિનું ઉદ્ઘાટન કરશે.

આ કાર્યક્રમમાં ઘણા દેશોના પ્રતિનિધિઓ ભાગ લઈ રહ્યા છે. આ કાર્યક્રમમાં ગ્રીન હાઇડ્રોજન અને ભવિષ્યના ઉર્જા ઉકેલો પર વિશેષ ચર્ચાઓ કરવામાં આવશે. આ ઉપરાંત પીએમ મોદી ગાંધીનગરમાં પીએમ સૂર્ય ઘર મફત વીજળી યોજનાના લાભાર્થીઓ સાથે વાતચીત કરશે.

સવારે લગભગ 09:45 વાગ્યે, PM ગાંધીનગરમાં સૂર્ય ઘર મફત વીજળી યોજનાના લાભાર્થીઓ સાથે વાર્તાલાપ કરશે.સવારે 10:30 કલાકે ગુજરાતના ગાંધીનગરમાં રી-ઈન્વેસ્ટનું ઉદ્ઘાટન કરશે.બપોરે 1:45 વાગ્યે અમદાવાદ મેટ્રો રેલ પ્રોજેક્ટનું ઉદ્ઘાટન કરશે અને સેક્શન-1 મેટ્રો સ્ટેશનથી ગિફ્ટ સિટી મેટ્રો સ્ટેશન સુધી મેટ્રોની સવારી કરશે.લગભગ 3:30 વાગ્યે 8000 કરોડના પ્રોજેક્ટનું ઉદ્ઘાટન કરશે.