નવી દિલ્હી. ભારત પર મોટા આતંકવાદી હુમલાનો ખતરો તોળાઈ રહ્યો છે. ખાસ કરીને ISIS અને અલ કાયદાના આતંકવાદીઓ દેશ પર હુમલો કરવાની યોજના બનાવી રહ્યા છે. આ બંને આંતરરાષ્ટ્રીય આતંકવાદી સંગઠનો જમ્મુ-કાશ્મીરની આસપાસ સક્રિય છે.

  ટેરર ફંડિંગ અને મની લોન્ડરિંગ પર ચાંપતી નજર રાખનારી આંતરરાષ્ટ્રીય સંસ્થા ફાઇનાન્સિયલ એક્શન ટાસ્ક ફોર્સ (FATF)એ પોતાના તાજેતરના રિપોર્ટમાં આ વાત કહી છે. રિપોર્ટમાં કહેવામાં આવ્યું છે કે ભારત સામે સૌથી મોટો આતંકવાદી ખતરો ISIS અથવા અલ કાયદા સાથે જોડાયેલા જૂથોથી છે. FATFએ ગુરુવારે રિપોર્ટ જાહેર કર્યો

  FATFના 368 પાનાના અહેવાલમાં મણિપુરની તાજેતરની સ્થિતિનો પણ ઉલ્લેખ કરવામાં આવ્યો છે, જ્યાં એક વર્ષથી વધુ સમયથી જાતિય હિંસા ચાલુ છે, જેના પરિણામે 220 થી વધુ લોકોના મોત થયા છે.

  રિપોર્ટમાં કહેવામાં આવ્યું છે કે વર્ષ 2023માં આતંકવાદી-ધિરાણ (TF) તપાસમાં અચાનક વધારો થયો હતો અને તેનું કારણ મણિપુરમાં બનેલી ઘટનાઓ હતી. જેના કારણે 50 થી વધુ કેસમાં આવી તપાસ હાથ ધરવામાં આવી છે. FATFએ કહ્યું કે 1947માં આઝાદી બાદથી ભારત સતત આતંકવાદની અસરોથી પીડાઈ રહ્યું છે

   FATF રિપોર્ટમાં કહેવામાં આવ્યું છે કે ભારત વિવિધ પ્રકારના આતંકવાદના ખતરાનો સામનો કરી રહ્યું છે, જેને 6 અલગ-અલગ વિસ્તારોમાં વહેંચવામાં આવ્યા છે. આનું ટૂંકમાં વર્ણન આ રીતે કરી શકાય છે કે આ ISIL અથવા અલ-કાયદા સાથે સંકળાયેલા જૂથો છે જે જમ્મુ અને કાશ્મીરમાં અને તેની આસપાસ સક્રિય છે. FATF, પેરિસ સ્થિત વૈશ્વિક સંસ્થા છે, જે કાર્યવાહીનું નેતૃત્વ કરે છે અને આતંકવાદને ધિરાણ અને મની લોન્ડરિંગ સામે લડવા માટેની ભલામણોને અંતિમ સ્વરૂપ આપે છે

 . FATFએ જણાવ્યું હતું કે ભારતના ઉત્તર-પૂર્વ અને ઉત્તરીય પ્રદેશોમાં પ્રાદેશિક બળવો અને સરકારને ઉથલાવી દેવાનો પ્રયાસ કરી રહેલા ડાબેરી નક્સલવાદી જૂથો દેશ માટે અન્ય જોખમો છે.