<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Friday, 20th September 2024

અમેરિકામાં ધ્રૂવી પટેલ બની ‘મિસ ઈન્‍ડિયા વર્લ્‍ડવાઈડ ૨૦૨૪'

બોલીવુડ અભિનેત્રી અને યુનિસેફની એમ્‍બેસેડર બનવાની મારી ઈચ્‍છા છે : ગુજરાત મૂળની ધ્રુવી પટેલ

ન્‍યુયોર્ક, તા.૨૦: અમેરિકામાં કોમ્‍પ્‍યુટર ઈન્‍ફોર્મેશન સિસ્‍ટમ્‍સની વિદ્યાર્થિની ધ્રુવી પટેલે મિસ ઈન્‍ડિયા વર્લ્‍ડવાઈડ ૨૦૨૪નો તાજ જીત્‍યો છે. આ જીતની ખુશી વ્‍યક્‍ત કરતા ધ્રુવી પટેલે જણાવ્‍યું હતું કે, બોલીવુડ અભિનેત્રી અને યુનિસેફની એમ્‍બેસેડર બનવાની મારી ઈચ્‍છા છે. મિસ ઈન્‍ડિયા વર્લ્‍ડવાઈડનો તાજ એક અમૂલ્‍ય સન્‍માન છે. ન્‍યુજર્સીના એડિસનમાં આયોજિત સમારોહમાં ધ્રુવીને મિસ ઈન્‍ડિયા વર્લ્‍ડવાઈડ ૨૦૨૪નો તાજ પહેરાવવામાં આવ્‍યો હતો.

અહેવાલો અનુસાર, મિસ ઈન્‍ડિયા વર્લ્‍ડવાઈડ ૨૦૨૪ની આ રેસમાં સુરીનામની લિસા અબ્‍દોએલહકને ફર્સ્‍ટ રનર અપ જાહેર કરવામાં આવી હતી. નેધરલેન્‍ડની માલવિકા શર્મા સેકન્‍ડ રનર અપ રહી હતી. મિસિસ કેટેગરીમાં ત્રિનિદાદ અને ટોબેગોની સુઆન મોટેટ વિજેતા રહી હતી, જ્‍યારે તોહા નામ્‍બિયાર પ્રથમ અને યુનાઇટેડ કિંગડમની પવનદીપ કૌર બીજા ક્રમે રહી હતી.

કિશોરવયના વર્ગમાં ગ્‍વાડેલુપની સિએરા સુરેટને મિસ ટીન ઈન્‍ડિયા વર્લ્‍ડવાઈડનો ખિતાબ આપવામાં આવ્‍યો હતો. નેધરલેન્‍ડની શ્રેયા સિંઘને ફર્સ્‍ટ રનર અપ જાહેર કરવામાં આવી હતી, જ્‍યારે સુરીનામની શ્રદ્ધા ટેડજોને સેકન્‍ડ રનર અપ જાહેર કરવામાં આવી હતી. આ સૌંદર્ય સ્‍પર્ધાનું આયોજન ન્‍યૂયોર્ક સ્‍થિત ઈન્‍ડિયા ફેસ્‍ટિવલ કમિટી દ્વારા કરવામાં આવ્‍યું છે. તેનું નેતળત્ત્વ ભારતીય મૂળના નીલમ અને ધર્માત્‍મા સરન કરે છે. આ સ્‍પર્ધા આ વર્ષે તેની ૩૧મી વર્ષગાંઠની ઉજવણી કરી રહી છે.

અહેવાલો અનુસાર, ગુજરાત મૂળની ધ્રુવી પટેલ ક્‍વિનીપિયાક યુનિવર્સિટીમાં કોમ્‍પ્‍યુટર ઈન્‍ફોર્મેશન સિસ્‍ટમ્‍સની વિદ્યાર્થીની છે. ઈન્‍સ્‍ટાગ્રામ પર ધ્રુવીના ૧૮.૬ હજારથી વધુ ફોલોઅર્સ છે. ૨૦૨૩માં ધ્રુવીને મિસ ઈન્‍ડિયા ન્‍યૂ ઈંગ્‍લેન્‍ડનો તાજ પહેરાવવામાં આવ્‍યો હતો. તે પોતાના ઘરેથી 3D ચેરિટીઝ નામની એક નોન પ્રોફિટ સંસ્‍થા ચલાવે છે. સ્‍વયંસેવીની સાથે, તે જરૂરિયાતમંદો માટે ફૂડ ડ્રાઇવ અને ભંડોળ એકત્ર કરવાનો પણ પ્રયાસ કરે છે. ધ્રુવી પટેલ યુનિસેફ અને ફીડિંગ અમેરિકા જેવી ચેરિટી સંસ્‍થાઓમાં યોગદાન આપે છે.

(3:45 PM IST)