નવી દિલ્હી:  વડાપ્રધાન નરેન્દ્રભાઇ મોદી ત્રણ દિવસીય અમેરિકાના પ્રવાસે છે. આ દરમિયાન તેમણે ક્વાડ સમિટમાં ભાગ લીધો હતો. ક્વાડ સમિટમાં ભાગ લેતી વખતે તેમણે અમેરિકી પ્રમુખ જો બાઈડનને ખાસ ભેટ આપી હતી. મહત્ત્વપૂર્ણ છે કે, પીએમ મોદી અને જો બાઈડન વચ્ચે સારી મિત્રતા છે. બંને વચ્ચે ખૂબ જ રસપ્રદ બોન્ડિંગ જોવા મળે છે.

પીએમ મોદીએ બાઈડનને ચાંદીની બનેલી પ્રાચીન હાથથી કોતરેલી ટ્રેનનું મોડેલ ભેટમાં આપ્યું છે. જ્યારે પ્રમુખના પત્ની અને અમેરિકાની ફર્સ્ટ લેડી જીલ બાઈડનને પીએમ મોદીએ પેપર મેશી બોક્સમાં પેક કરેલી એક પશ્મિના શાલ ભેટ કરી હતી. ઉલ્લેખનીય છે કે, ક્વાડ મીટિંગમાં ભારત, અમેરિકા, જાપાન અને ઓસ્ટ્રેલિયાના ટોચના નેતાઓ ભાગ લે છે.

આ ચાંદીની ટ્રેનની ખાસ વાત એ છે કે, તેને મહારાષ્ટ્રના કારીગરો દ્વારા તૈયાર કરવામાં આવી છે. આ વિન્ટેજ સિલ્વર હેન્ડ એન્ગ્રેવ્ડ ટ્રેન મોડલ એક દુર્લભ માસ્ટરપીસ છે. 92.5% ચાંદીથી બનેલું, આ મોડેલ ભારતીય ધાતુની કારીગરીની કલા દર્શાવે છે. તેમાં પરંપરાગત તકનીકો જેવી કે, રિપોસે (ઊભરતા ડિઝાઇન બનાવવા માટે પાછળથી હથોડી મારવી) અને જટિલ ફિલિગ્રી વર્કના માધ્યમથી વિસ્તૃત વિવરણ કરવામાં આવ્યું છે. આ ટ્રેન સ્ટીમ એન્જિન યુગને શ્રદ્ધાંજલિ આપે છે.

પશ્મિના શાલ પરંપરાગત રીતે જમ્મુ અને કાશ્મીરથી કાગળના મેશી બોક્સમાં પેક કરવામાં આવે છે, જે તેમની ઉત્કૃષ્ટ સુંદરતા અને કારીગરી માટે પ્રખ્યાત છે. આ બોક્સ કાગળના પલ્પ, ગમ અને અન્ય કુદરતી સામગ્રીના મિશ્રણનો ઉપયોગ કરીને હાથથી બનાવવામાં આવે છે. દરેક બોક્સ કલાનું અનોખું કામ છે, જે કાશ્મીરના સમૃદ્ધ સાંસ્કૃતિક વારસાને પ્રતિબિંબિત કરે છે. આ બૉક્સ માત્ર કાર્યાત્મક નથી, પરંતુ સુશોભન માટેની વસ્તુ તરીકે ઉપયોગી સાબિત થાય છે.