ઉદયપુર : રાજસ્થાનના ઉદયપુરમાં વન વિભાગ, આર્મી અને પોલીસ દ્વારા સઘન સર્ચ ઓપરેશન છતાં માનવભક્ષી દીપડો પકડાયો નથી ત્યારે લોકોમાં ભયનો માહોલ જોવા મળી રહ્યો છે. રવિવારે ઝુંઝુનુ જિલ્લામાં રસ્તા પર એક દીપડો જોવા મળ્યો હતો, જેના કારણે સ્થાનિક લોકોમાં ગભરાટ ફેલાયો હતો. સીસીટીવી ફૂટેજમાં દીપડો વાહનોની અવરજવર વચ્ચે ગુડા ગોરજી-ઝુંઝુનુ રોડ ક્રોસ કરતો જોવા મળે છે.

તાજેતરમાં ઉદયપુરના ગોગુંડામાં કથિત રીતે ત્રણ લોકોની હત્યા કરનાર માનવભક્ષી દીપડાની શોધ શનિવારના રોજ તીવ્ર બની હતી અને તેને પકડવા માટે સૈન્યની ટીમ તૈનાત કરવામાં આવી હતી. જો કે હજુ સુધી દીપડો મળી આવ્યો નથી.

ઉદયપુર વન વિભાગના અધિકારીએ જણાવ્યું કે આ વિસ્તારમાં ડ્રોન અને કેમેરાનો ઉપયોગ કરવામાં આવ્યો હતો પરંતુ દીપડાની હિલચાલને પકડી શકાઈ નથી. સેનાના જવાનો, પોલીસ અને વન વિભાગની ટીમોએ રવિવારે પણ સર્ચ ઓપરેશન ચાલુ રાખ્યું હતું, ઉદયપુરના ડેપ્યુટી કન્ઝર્વેટર અજય ચિત્તૌરાએ જણાવ્યું હતું કે અમે વિવિધ સ્થળોએ કેમેરા ટ્રેપ લગાવી છે, પરંતુ હજુ સુધી દીપડાની કોઈ નિશાની મળી નથી.