છેલ્લા 8 દિવસમાં સૌથી લોકપ્રિય હેં...વારાણસીમાં ભાજપનો પરાજય 9:51 AM
ચાઇલ્ડ પોનોગ્રાફી જોવી - સ્ટોર કરવી - ડાઉનલોડ કરવી એ ગુન્હો
સુપ્રિમ કોર્ટનો મહત્વના ફેંસલો : કોર્ટે મદ્રાસ હાઇકોર્ટનો ફેંસલો પલ્ટાવતા કહ્યું કે આવું જોવું - સ્ટોર કરવું બંને પોકસો એકટ હેઠળ અપરાધ છે : ‘ચાઇલ્ડ પોનોગ્રાફી' શબ્દનો ઉપયોગ પણ ન કરવા તમામ કોર્ટને આપ્યો આદેશ : કેન્દ્રને પણ ‘ચાઇલ્ડ સેક્સુઅલ એન્ડ એકસપ્લોઇટીવ એન્ડ એબ્યુઝ મટીરીયલ' શબ્દનો ઉપયોગ કરવા વટહુકમ લાવવા સૂચના
નવી દિલ્હી તા. ૨૩ : સુપ્રીમ કોર્ટે ચાઈલ્ડ પોર્નોગ્રાફી અંગે મહત્વનો નિર્ણય આપતા કહ્યું છે કે તેને ડાઉનલોડ કરવી અને જોવી એ POCSO એક્ટ હેઠળ ગુનો છે. આ સાથે જ કોર્ટે કેન્દ્ર સરકારને સંસદમાંથી એક કાયદો પસાર કરાવવાની સલાહ આપી, જેમાં બાળકોની જાતીય સતામણી અંગે સ્પષ્ટ જોગવાઈઓ હોવી જોઈએ. ચાઈલ્ડ પોર્નોગ્રાફી પર નિયમો નક્કી કરવા જોઈએ જેથી કરીને બાળકોને ઉત્પીડનથી બચાવી શકાય. આ સિવાય ચીફ જસ્ટિસ ડીવાય ચંદ્રચુડની આગેવાની હેઠળની બેંચે મદ્રાસ હાઈકોર્ટના નિર્ણય પર પણ સવાલ ઉઠાવ્યા હતા,
જેમાં કહ્યું હતું કે માત્ર ચાઈલ્ડ પોર્નોગ્રાફી ડાઉનલોડ કરવી અને જોવી એ ગુનો નથી.
સુપ્રીમ કોર્ટે કહ્યું કે હાઈકોર્ટનો આ નિર્ણય સંપૂર્ણપણે ખોટો હતો અને તે એક ભૂલ હતી. હાઈકોર્ટે આ ચુકાદો ૨૮ વર્ષીય વ્યક્તિ પર લાગેલા આરોપોના કેસમાં આપ્યો હતો. આ વ્યક્તિ પર તેના ફોનમાં ચાઇલ્ડ પોર્નોગ્રાફી ડાઉનલોડ કરીને તેને જોવાનો આરોપ હતો. કોર્ટે આ કેસમાં યુવક સામેની કાર્યવાહીને ફગાવી દીધી હતી. કોર્ટે કહ્યું કે આજે બાળકો ચાઈલ્ડ પોર્નોગ્રાફીનો શિકાર બની રહ્યા છે. સમાજે બાળકોને આ અંગે જાગૃત અને શિક્ષિત કરવા જોઈએ. તેના બદલે તેમને સજા કરવી યોગ્ય નથી. ,
બેન્ચે ૧૯ એપ્રિલે પોતાનો નિર્ણય સુરક્ષિત રાખ્યો હતો. કોર્ટે કહ્યું હતું કે ડિજિટલ યુગમાં બાળકોની સુરક્ષા માટે કાયદા સાથે જોડાયેલા ગંભીર પ્રશ્નોના જવાબ આપવા જરૂરી છે. જાન્યુઆરી ૨૦૨૪ માં, મદ્રાસ હાઈકોર્ટના જસ્ટિસ એન આનંદ વેંકટેશે, ૨૮ વર્ષીય વ્યક્તિને રાહત આપતા, તેની સામેના ફોજદારી કેસને રદ કર્યો હતો. યુવક પર ચાઈલ્ડ પોર્ન જોવા અને ડાઉનલોડ કરવાનો આરોપ હતો. જસ્ટિસ વેંકટેશે કહ્યું હતું કે માત્ર ચાઈલ્ડ પોર્ન જોવું એ પોક્સો અને આઈટી એક્ટ હેઠળ ગુનો ગણી શકાય નહીં.
તેમના કહેવા પ્રમાણે, જો બાળકોનો પોર્નોગ્રાફીમાં ઉપયોગ કરવામાં આવે છે તો તેમની વિરૂદ્ધ POCSO એક્ટ હેઠળ કેસ દાખલ થઈ શકે છે. તે જ સમયે, જયારે કોઈ વ્યક્તિ સીધી રીતે સામેલ થયા વિના માત્ર ચાઇલ્ડ પોર્ન જુએ છે, તો તેના પર ગુનાહિત કાર્યવાહી કરવી યોગ્ય નથી. આઇટી એક્ટની કલમ ૬૭બીને ટાંકીને હાઇકોર્ટે કહ્યું હતું કે આરોપીએ ન તો આવી સામગ્રી પ્રકાશિત કરી છે કે ન તો કોઇને મોકલી છે. જયારે આરોપીએ પોર્ન માટે બાળકનો ઉપયોગ કર્યો નથી તો તેની સામે ગુનો સાબિત થતો નથી. જો કે, એવું કહી શકાય કે યુવાન નૈતિક પતનનો ભોગ બન્યો છે. માર્ચમાં સુનાવણી દરમિયાન સુપ્રીમ કોર્ટની બેન્ચે હાઈકોર્ટના આ આદેશની ટીકા કરી હતી. સુપ્રીમ કોર્ટે જજની કાનૂની સમજ પર પણ સવાલ ઉઠાવ્યા હતા. સુપ્રીમ કોર્ટની બેન્ચે કહ્યું હતું કે એક જ જજ આવું કઈ રીતે કહી શકે? આ ભયાનક છે. એપ્રિલમાં સુનાવણી દરમિયાન સુપ્રીમ કોર્ટે કહ્યું હતું કે ડિજિટલ કન્ટેન્ટ અંગે પણ જવાબદારી જરૂરી છે.
(3:07 PM IST)
