બેરૂત : લેબનોનમાં પેજર અને વોકી-ટોકી વિસ્ફોટ પછી, ઇઝરાયેલે હવે હિઝબુલ્લા સાથે સીધુ યુદ્ધ શરૂ કર્યું છે. સોમવારે, ઇઝરાયેલે હિઝબુલ્લાહના લક્ષ્યો પર મોટા હુમલાઓ કર્યા, જેમાં 182 થી વધુ લોકો માર્યા ગયા અને 727 થી વધુ ઘાયલ થયા. લેબનીઝ આરોગ્ય મંત્રાલયે આની પુષ્ટિ કરી છે.

તે જ સમયે, આ હુમલા પછી, ઇઝરાયેલી સેનાએ કહ્યું કે તેણે લેબનોનમાં 300 લક્ષ્યો પર હુમલો કર્યો, હિઝબુલ્લાહ આતંકવાદી જૂથ વિરુદ્ધ દબાણ વધારી દીધું.

સેનાએ પહેલા જ સોશિયલ મીડિયા પ્લેટફોર્મ X પર હુમલાની જાહેરાત કરી દીધી હતી. આર્મી ચીફ લેફ્ટનન્ટ જનરલ હરજી હલેવીના નિવેદનને શેર કરતા તેમણે કહ્યું કે ઇઝરાયેલ હવે લેબેનોન પર વધુ હુમલા કરવા માટે તૈયાર છે.

હિઝબુલ્લાહ સામેની લડાઈના લગભગ એક વર્ષમાં આ સૌથી મોટા હવાઈ હુમલાઓમાંનો એક છે. હલેવી અને અન્ય ઇઝરાયેલના નેતાઓએ આગામી દિવસોમાં હિઝબુલ્લાહ સામે કડક કાર્યવાહીનું વચન આપ્યું છે. ઇઝરાયેલે સોમવારે દક્ષિણ લેબનોનના રહેવાસીઓને તેમના ઘર છોડવા કહ્યું. ઈઝરાયેલનો દાવો છે કે હિઝબુલ્લાએ અહીં તેના હથિયારોનો સંગ્રહ કર્યો છે.

ઇઝરાયલના સૈન્ય પ્રવક્તાએ કહ્યું કે તે બેકામાં હિઝબુલ્લાહના સ્થાનો પર હુમલો કરવાની તૈયારી કરી રહ્યું છે. હિઝબુલ્લાએ લેબનોનની બેકા ખીણમાં ઘરોમાં તેના શસ્ત્રોનો સંગ્રહ છુપાવ્યો છે. નાગરિકોએ તાત્કાલિક ત્યાંથી નીકળી જવું જોઈએ. લેબનોનના માહિતી પ્રધાન ઝિયાદ માકરીએ જણાવ્યું હતું કે તેમના મંત્રાલયને બિલ્ડિંગને ખાલી કરાવવાનો આદેશ આપતો કોલ મળ્યો હતો, પરંતુ ઉમેર્યું હતું કે મંત્રાલય આવું કંઈ કરશે નહીં.

લેબનીઝ રાજ્ય મીડિયાએ જણાવ્યું હતું કે રોકેટ સોમવારે લેબનીઝ બંદર શહેર બાયબ્લોસની પૂર્વમાં એક ટેકરી પર પડ્યું હતું. આ એવો વિસ્તાર છે જ્યાં અગાઉ ક્યારેય હવાઈ હુમલા થયા નથી. આ વિસ્તાર ખ્રિસ્તી અને શિયા ગામો વચ્ચે આવે છે.