ઉજ્જૈન,તા. ૭: તિરુપતિ મંદિરમાં પ્રસાદના લાડુમાં ચરબીયુક્‍ત ઘી વપરાતું હોવાના આરોપ બાદ મધ્‍ય પ્રદેશના ઉજ્જૈનના મહાકાલ મંદિરમાં આપવામાં આવતા પ્રસાદના લાડુની શુદ્ધતાની તપાસ કરાવવામાં આવી હતી અને ૧૩ પ્રકારની ટેસ્‍ટમાંથી આ લાડુ પાસ થયો હતો. આ પ્રસાદના લાડુમાં કોઈ પણ પ્રકારની ભેળસેળ નથી એમ લેબોરેટરીના રિપોર્ટમાં જણાવવામાં આવ્‍યું છે.

ફૂડ સેફટી એન્‍ડ સ્‍ટાન્‍ડર્ડ્‍સ ઓથોરિટી ઓફ ઇન્‍ડિયા (FSSAI) પાસેથી માન્‍યતાપ્રાપ્ત મધ્‍ય પ્રદેશની આધુનિક લેબોરેટરીમાં આ પ્રસાદના લાડુની ટેસ્‍ટ કરવામાં આવી હતી અને લાડુ બનાવવા માટે વપરાતા ઘી, દાળ સહિતના વિવિધ ઘટકોમાં કોઈ જાતની ભેળસેળની જાણકારી મળી નહોતી.