નવી દિલ્હી :ચૂંટણી પંચે મહારાષ્ટ્ર વિધાનસભા ચૂંટણીની તારીખ જાહેર કરી છે. રાજ્યની 288 બેઠકો પર 20મી નવેમ્બરે એક તબક્કામાં મતદાન થશે. આ જાહેરાતથી રાજ્યનું રાજકીય તાપમાન ઉંચુ થઈ ગયું છે. રાજકીય પક્ષોએ તૈયારીઓને આખરી ઓપ આપી દીધો છે. આ શ્રેણીમાં મહાવિકાસ અઘાડીમાં 220 બેઠકો પર સર્વસંમતિ સધાઈ છે. ત્રણેય પક્ષો (કોંગ્રેસ, એનસીપી 'શરદ પવાર જૂથ' અને શિવસેના 'ઉદ્ધવ જૂથ') હાલમાં આ બેઠકો પર ઉમેદવારોની પસંદગીની પ્રક્રિયા સાથે આગળ વધશે.

     મહાવિકાસ અઘાડીના પક્ષો વચ્ચે બાકીની બેઠકો પર ટૂંક સમયમાં સહમતિ સાધવામાં આવશે. ઉમેદવારોની પસંદગી માટે કોંગ્રેસની સ્ક્રીનિંગ કમિટીની બેઠક બુધવારે સાંજે 5 વાગ્યે દિલ્હીમાં કોંગ્રેસના મુખ્યાલયમાં યોજાશે. સૂત્રોના જણાવ્યા અનુસાર કોંગ્રેસ અને ઉદ્ધવ ઠાકરેની શિવસેના લગભગ સમાન સંખ્યામાં બેઠકો પર ચૂંટણી લડશે. કોંગ્રેસ એકલી 105 થી 110 સીટો પર ચૂંટણી લડશે.

     વિપક્ષે પણ ચૂંટણીની તારીખોની જાહેરાત પર પ્રતિક્રિયા આપી છે. વિપક્ષે કહ્યું કે ચૂંટણી પંચે 35 દિવસમાં વિધાનસભા ચૂંટણી પ્રક્રિયા પૂર્ણ કરવાની જાહેરાત કરી છે. યુપી પછી મહારાષ્ટ્ર વિધાનસભા સૌથી મોટી છે. આમ છતાં એક તબક્કામાં ચૂંટણી યોજાઈ રહી છે. આ વર્ષે રાજ્યમાં 5 તબક્કામાં લોકસભાની ચૂંટણી યોજાઈ હતી 

    કોંગ્રેસના નેતા વિજય વડેટ્ટીવારે કહ્યું કે, ચૂંટણી પંચ રાજકીય પક્ષોને ઉમેદવારો નક્કી કરવા, ઉમેદવારી નોંધાવવા અને પ્રચાર કરવા માટે લગભગ 40 દિવસનો સમય આપે છે. પરંતુ, આ વખતે અમને 35 દિવસ મળ્યા છે. જેના કારણે અમને પ્રચાર માટે ઓછો સમય મળશે. વિપક્ષને ઓછો સમય આપવાના કેટલાક આયોજનનો આ પણ ભાગ હોઈ શકે છે.