મુંબઈ તા.૧૬ : પ્રાગમાં પ્રિયંકા ચોપરાના પતિ નિક જોનસનો કોન્સર્ટ યોજાયો હતો, જે દરમિયાન એક અપ્રિય ઘટના બની જેણે દરેકને ચોંકાવી દીધા. આ ઘટનાનો એક વીડિયો વાયરલ થઈ રહ્યો છે.

ગ્લોબલ સ્ટાર પ્રિયંકા ચોપરાના પતિ અને પ્રખ્યાત સિંગર નિક જોનસની જબરદસ્ત ફેન ફોલોઈંગ છે. દુનિયાભરના લોકો તેમના કોન્સર્ટમાં આવે છે અને નિક જોનસના તમામ શો હાઉસફુલ જાય છે. નિક જોનસ હાલમાં તેમના મ્યુઝિકલ વર્લ્ડ ટૂર દરમિયાન સમગ્ર વિશ્વમાં પરફોર્મ કરી રહ્યા છે. તે તેમના ભાઈઓ કેવિન અને જો જોનસ સાથે મળીને વિવિધ શહેરોમાં લાઈવ શો દ્વારા ચાહકોનું મનોરંજન કરી રહ્યા છે. હવે નિકનો તેના લેટેસ્ટ શોનો એક વીડિયો વાયરલ થઈ રહ્યો છે, જેને જોઈને તેના તમામ ફેન્સની ચિંતા વધી ગઈ છે.

તાજેતરમાં, પ્રાગમાં તેમનો એક કોન્સર્ટ યોજાયો હતો, જે દરમિયાન એક અપ્રિય ઘટના બની જેણે દરેકને ચોંકાવી દીધા. પ્રાગમાં આ લાઈવ શોમાં, જ્યારે નિક તેના ભાઈઓ સાથે સ્ટેજ પર પરફોર્મ કરી રહ્યો હતો, ત્યારે ભીડમાંથી કોઈએ તેને લેસર લાઈટથી ટાર્ગેટ કર્યો. વાયરલ વીડિયોમાં જોઈ શકાય છે કે ક્યારેક કોઈએ નિકના માથા પર તો ક્યારેક તેના શરીર પર લાલ લેસર લાઈટથી નિશાન બનાવવાનો પ્રયાસ કર્યો. લેઝરને તેની તરફ ટાર્ગેટ થતું જોઈને નિક જોનસ ગભરાઈ ગયો અને શો અધવચ્ચે છોડીને સ્ટેજ પરથી ભાગી ગયો.

કોન્સર્ટનો નિક જોનસનો વીડિયો વાયરલ થઈ રહ્યો છે. જેમાં તે ગભરાયેલો દેખાય છે. સ્ટેજ પરથી ભાગતી વખતે નિક સિક્યોરિટી તરફ ઈશારો કરતો જોવા મળ્યો. આ દરમિયાન તેણે હાથ વડે શો અટકાવી દેવાનો પણ ઈશારો કર્યો. નિકને સ્ટેજ પરથી અચાનક ભાગતો જોઈને ત્યાં હાજર દર્શકો ચોંકી ગયા હતા.

નિક જોનસની આ પ્રતિક્રિયા બાદ શો થોડા સમય માટે રોકી દેવામાં આવ્યો. સિક્યોરિટી ટીમે તરત જ કાર્યવાહી કરી અને લેસર લાઇટનો ઉપયોગ કરનાર વ્યક્તિને શોમાંથી બહાર કરી દીધો. નિકે પોતાને સુરક્ષિત કર્યો અને સમયસર સ્ટેજ છોડી દીધું. જો કે, તેના ભાઈઓ કેવિન અને જો સ્ટેજ પર ઉભા રહ્યા જ્યારે નિકે શો દરમિયાન ટાઇમ આઉટનું સિગ્નલ આપ્યું હતું.

આ ઘટના બાદ નિકના ચાહકોએ સોશિયલ મીડિયા પર તેની સુરક્ષાને લઈને ચિંતા વ્યક્ત કરી છે. વાયરલ વીડિયો પર ફેન્સ તરફથી કોમેન્ટ્સનું પૂર આવ્યો છે. એક યુઝરે લખ્યું- આ ભયાનક છે. ખુશી છે કે નિક ઠીક છે. બીજાએ લખ્યું- ભગવાન નિકની રક્ષા કરે. ઘણા ચાહકો એવો પણ સવાલ કરી રહ્યા છે કે શું શો દરમિયાન કોઈ નિક જોનાસ પર હુમલો કરવા ઈચ્છતું હતું? એક ચાહકે લખ્યું, નિક પર લેસર શા માટે બતાવવી છે? શું લોકોમાં મેનર્સ નથી? આ ઘટના બાદ નિકના ચાહકો ચિંતિત છે, પરંતુ રાહતની વાત એ છે કે સિંગરે સાવધાનીથી કામ લીધું અને પોતાને સુરક્ષિત કરી લીધો.

આ પહેલીવાર નથી જ્યારે લાઈવ શો દરમિયાન કોઈ લોકપ્રિય સેલિબ્રિટી પર આ પ્રકારનો હુમલો થયો હોય. આ પહેલા પણ ઘણા સ્ટાર્સને સ્ટેજ પરફોર્મન્સ દરમિયાન ચાહકોની અરાજકતાનો સામનો કરવો પડ્યો છે. આ ઘટનાઓ માત્ર ચાહકોની જવાબદારીનો જ અભાવ નથી દર્શાવતી, પરંતુ સાર્વજનિક પ્રદર્શન કરતી વખતે કલાકારોની સલામતી કેટલી મહત્ત્વપૂર્ણ છે તે પણ યાદ અપાવે છે.