નવી દિલ્હી : નાયબ સિંહ સૈની ગુરુવારે હરિયાણાના મુખ્યમંત્રી તરીકે શપથ લેશે. શપથ ગ્રહણ સમારોહમાં વડાપ્રધાન નરેન્દ્ર મોદી, કેન્દ્રીય ગૃહમંત્રી અમિત શાહ અને બીજેપીના ટોચના નેતૃત્વ અને અન્ય નેતાઓ હાજરી આપશે. શપથ ગ્રહણ સમારોહ માટે પંચકુલામાં ચુસ્ત સુરક્ષા વ્યવસ્થા કરવામાં આવી છે. નાયબ સિંહ સૈની બુધવારે રાજ્યપાલ બંડારુ દત્તાત્રેયને મળ્યા હતા. આ પહેલા તેમને પંચકુલામાં પાર્ટી કાર્યાલયમાં મળેલી બેઠકમાં વિધાયક દળના નેતા તરીકે પસંદ કરવામાં આવ્યા હતા.

    શપથ ગ્રહણ સમારોહમાં પીએમ મોદી અને અમિતભાઈ  શાહ ઉપરાંત રાજનાથ સિંહ, ભાજપના રાષ્ટ્રીય અધ્યક્ષ જેપી નડ્ડા, અનેક કેન્દ્રીય મંત્રીઓ, ઘણા રાજ્યોના મુખ્યમંત્રીઓ અને પાર્ટીના વરિષ્ઠ નેતાઓ હાજર રહેશે. આ પહેલા નાયબ સરકારમાં કયા ધારાસભ્યોને મંત્રીમંડળમાં સ્થાન મળશે તે અંગે ઉગ્ર ચર્ચા ચાલી રહી છે. જેમાં અનિલ વિજ, મહિપાલ ધાંડા, મૂળચંદ શર્મા જેવા નેતાઓના નામ ચર્ચામાં છે.

   આ સિવાય મુખ્યમંત્રી નયબ સિંહ સૈનીની કેબિનેટમાં અન્ય ચાર નામોની પણ ચર્ચા થઈ રહી છે. સાવિત્રી જિંદાલ પણ તેમાં છે. તે અપક્ષ ધારાસભ્ય તરીકે ચૂંટાયા છે. સાવિત્રી કુરુક્ષેત્રના બીજેપી સાંસદ નવીન જિંદાલની માતા છે. તે માર્ચમાં ભાજપમાં જોડાઈ હતી. પરંતુ, વિધાનસભા ચૂંટણીમાં ટિકિટ ન મળતા, તેણીએ હિસાર વિધાનસભા બેઠક પરથી અપક્ષ ઉમેદવાર તરીકે ચૂંટણી લડી અને જીતી. આ પછી તેમણે ભાજપને સમર્થન જાહેર કર્યું. 

   હરિયાણામાં 5 ઓક્ટોબરે ચૂંટણી યોજાઈ હતી. રાજ્યમાં ભાજપે 90માંથી 48 બેઠકો જીતી છે. જ્યારે કોંગ્રેસને 37 બેઠકો મળી હતી. રાજ્યમાં ભાજપ સતત ત્રીજી વખત સરકાર બનાવવા જઈ રહી છે. તેમજ નાયબ સિંહ સૈની બીજી વખત મુખ્યમંત્રી તરીકે શપથ લેશે. ભાજપના નેતાઓનું કહેવું છે કે શપથ ગ્રહણ સમારોહમાં લગભગ 50 હજાર લોકો સામેલ થઈ શકે છે.