નવી દિલ્‍હી, ૧૭: દેશના દિગ્‍ગજ નેતાઓની સુરક્ષા વ્‍યવસ્‍થાને લઈને કેન્‍દ્ર સરકારે મોટો નિર્ણય લીધો છે. સત્તાવાર સૂત્રોના જણાવ્‍યા અનુસાર, સરકારે NSGને VIP સુરક્ષામાંથી સંપૂર્ણપણે હટાવવાનો નિર્ણય લીધો છે. માહિતી અનુસાર, સરકારે થોડા મહિનામાં નવ અત્‍યંત જોખમી VIPsની સુરક્ષા CRPFને સોંપવાનો આદેશ આપ્‍યો છે. આ ૯ VIP લોકોની યાદીમાં ઉત્તરપ્રદેશના મુખ્‍યમંત્રી યોગી આદિત્‍યનાથ સહિત ઘણા મોટા નેતાઓના નામ છે.

ગળહ મંત્રાલયના સૂત્રો દ્વારા આપવામાં આવેલી માહિતી અનુસાર, હવે CRPFને VIPની સુરક્ષા માટે તૈનાત કરવામાં આવશે જેની સુરક્ષા હેઠળ NSG તૈનાત છે. VIPની સુરક્ષા NSG તરફથી CRPFને તબક્કાવાર સોંપવામાં આવશે. મળતી માહિતી મુજબ આ સમગ્ર ફેરફાર લગભગ ૨ મહિનામાં પૂર્ણ થશે.

નેશનલ સિકયોરિટી ગાર્ડ (NSG)ના ‘બ્‍લેક કેટ' કમાન્‍ડો દ્વારા સુરક્ષિત કરાયેલા નવ ‘Z Plus' સ્‍તરના VIPsમાં ઉત્તરપ્રદેશના મુખ્‍યમંત્રી યોગી આદિત્‍યનાથ, BSP પ્રમુખ માયાવતી, કેન્‍દ્રીય સંરક્ષણ મંત્રી રાજનાથ સિંહ, ભાજપના વરિષ્ઠ નેતા લાલકળષ્‍ણ અડવાણી, કેન્‍દ્રીય શિપિંગ મંત્રી સર્બાનંદ સોનોવાલ, છત્તીસગઢના ભૂતપૂર્વ મુખ્‍યપ્રધાન રમણ સિંહ, જમ્‍મુ અને કાશ્‍મીરના ભૂતપૂર્વ મુખ્‍યપ્રધાન અને ડેમોક્રેટિક પ્રોગ્રેસિવ આઝાદ પાર્ટી (DPAP)ના પ્રમુખ ગુલામ નબી આઝાદ, નેશનલ કોન્‍ફરન્‍સ (NC)ના પ્રમુખ ફારુક અબ્‍દુલ્લા અને આંધપ્રદેશના મુખ્‍ય પ્રધાન એન ચંદ્રબાબુ નાયડુ નો સમાવેશ થાય છે. હવે તેમની સુરક્ષા CRPFને આપવામાં આવશે.

પીટીઆઈના જણાવ્‍યા અનુસાર, ગૃહ મંત્રાલયે સીઆરપીએફની વીઆઈપી સુરક્ષામાં વિશેષ પ્રશિક્ષિત કર્મચારીઓની નવી બટાલિયન ઉમેરવાની પણ મંજૂરી આપી છે. હાલમાં CRPF પાસે ૬ VIP સુરક્ષા બટાલિયન છે. મળતી માહિતી મુજબ, આ બટાલિયનને તાજેતરમાં સંસદની સુરક્ષામાંથી હટાવી દેવામાં આવી હતી. તમને જણાવી દઈએ કે ગયા વર્ષે સંસદની સુરક્ષામાં ક્ષતિ બાદ સંસદની સુરક્ષા સીઆરપીએફ પાસેથી સીઆઈએસએફને સોંપવામાં આવી હતી.