નવી દિલ્હી તા.૧૭  : ઉત્તર કોરિયાના તાનાશાહ કિમ જોંગ ઉન જ્યારે પણ કોઈ નિર્ણય લે છે ત્યારે આખી દુનિયાની નજર તેમના પર કેન્દ્રિત હોય છે. તેમના મિસાઈલ પરીક્ષણથી અમેરિકામાં ગભરાટ ફેલાય છે.

હવે તેણે જે કામ કર્યું છે તેનાથી પડોશી દેશ દક્ષિણ કોરિયાની મુશ્કેલીઓ વધી ગઈ છે. કિમ જોંગ ઉને પ્રથમ વખત પોતાના દેશના બંધારણમાં સુધારો કરીને દક્ષિણ કોરિયાને 'દુશ્મન રાષ્ટ્ર' જાહેર કર્યું છે.

આ વર્ષે જાન્યુઆરીમાં તેમણે દક્ષિણ કોરિયાને દેશનો મુખ્ય દુશ્મન જાહેર કરવાની હાકલ કરી હતી. ત્યારે તેણે કહ્યું હતું કે જો દક્ષિણ કોરિયા આપણી જમીન, હવા અને પાણીની જગ્યાના 0.001 મીમી પણ અતિક્રમણ કરશે તો યુદ્ધ થશે.

દક્ષિણ કોરિયાને પ્રથમ વખત મુખ્ય દુશ્મન રાષ્ટ્ર જાહેર કર્યું

જોકે, આ પછી કોઈ મોટી હિલચાલ થઈ નથી. પરંતુ, ઉત્તર કોરિયાની સંસદે ગયા અઠવાડિયે બે દિવસ સુધી બેઠક યોજી હતી. આ પછી નિર્ણય લેવામાં આવ્યો કે દક્ષિણ કોરિયાને મુખ્ય દુશ્મન રાષ્ટ્ર જાહેર કરવામાં આવશે.

આ સાથે ઉત્તર કોરિયાએ તેને દક્ષિણ કોરિયા સાથે જોડતા ઘણા રસ્તાઓ અને રેલ નેટવર્કને નષ્ટ કરી દીધા છે, દક્ષિણ કોરિયાની સેનાએ ઉત્તર કોરિયાના સૈનિકો રસ્તાઓ અને રેલ માર્ગો પર વિસ્ફોટ કરતા હોવાનો વીડિયો જાહેર કર્યો છે.

જો કે, આ રસ્તાઓ અને રેલ લિંક્સ હાલમાં ઉપયોગમાં લેવાતા ન હતા. પરંતુ, એક સમયે તેણે બંને દેશોને જોડવામાં મહત્વની ભૂમિકા ભજવી હતી.

કોરિયન સેન્ટ્રલ ન્યૂઝ એજન્સી (KCNA) એ કહ્યું કે ઉત્તર કોરિયાનું પગલું દક્ષિણ કોરિયાને દુશ્મન રાષ્ટ્ર તરીકે સ્પષ્ટપણે વ્યાખ્યાયિત કરે છે. ઉત્તર કોરિયાના આ નિર્ણય બાદ દક્ષિણ કોરિયામાં તણાવ વધી ગયો છે.

લશ્કરને હલમે માટે તૈયાર રહેવાની સૂચના

તમને જણાવી દઈએ કે ઉત્તર કોરિયાએ ગયા રવિવારે પોતાની સેનાને દક્ષિણ કોરિયા પર હુમલો કરવા માટે તૈયાર રહેવાનો નિર્દેશ આપ્યો હતો. કિમ જોંગ ઉનની આ જાહેરાત બાદ બંને દેશો વચ્ચે તણાવ વધી ગયો છે.

હકીકતમાં, ઉત્તર કોરિયાનો આરોપ છે કે દક્ષિણ કોરિયાએ તેની રાજધાની પ્યોંગયાંગ પર ડ્રોન ઉડાડ્યા હતા. સાથે જ ધમકી પણ આપી હતી કે જો ફરી આવું થશે તો દક્ષિણ કોરિયાને પરિણામ ભોગવવા પડશે.

જોકે, દક્ષિણ કોરિયાએ આ આરોપને નકારી કાઢ્યો છે. સાથે જ ઉત્તર કોરિયાને ચેતવણી આપી છે કે જો તેના નાગરિકોની સુરક્ષા જોખમાશે તો તે સહન નહીં કરે.