<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Friday, 18th October 2024

જયપુરમાં RSSના ખીર વિતરણ કાર્યક્રમમાં છરી વડે હુમલો : ૮ સ્‍વયંસેવકો ઘાયલ

કેટલાક શંકાસ્‍પદ લોકોની પૂછપરછ માટે અટકાયત કરવામાં આવી છે

જયપુર, તા.૧૮: જયપુરમાં રાષ્‍ટ્રીય સ્‍વયંસેવક સંઘ (RSS)ના એક કાર્યક્રમ દરમિયાન ચાકુ અને લાકડીઓથી થયેલા હુમલામાં ઘણા લોકો ઘાયલ થયા છે. આ ઘટના ગુરુવારે મોડી રાત્રે બની હતી જ્‍યારે શરદ પૂર્ણિમાના અવસરે જયપુરના કરણી વિહારમાં ખીર વિતરણનો કાર્યક્રમ યોજાયો હતો. આ દરમિયાન છરી અને લાકડીઓ લઈને આવેલા કેટલાક અજાણ્‍યા લોકોએ સંઘના કાર્યકરો પર હુમલો કર્યો હતો. હુમલામાં ૭ થી ૮ કામદારો ઘાયલ થયા હોવાનું કહેવાય છે.

ઘાયલોની જયપુરની સવાઈ માન સિંહ હોસ્‍પિટલમાં સારવાર ચાલી રહી છે. રાજસ્‍થાન સરકારના કેબિનેટ મંત્રી રાજ્‍યવર્ધન સિંહ રાઠોડ, ધારાસભ્‍ય ગોપાલ શર્મા અને અન્‍ય લોકો ઘાયલોની ખબર પૂછવા હોસ્‍પિટલ પહોંચ્‍યા હતા. ડીસીપી (પશ્‍ચિમ) અમિત કુમારે જણાવ્‍યું હતું કે, આ ઘટનામાં સાતથી આઠ લોકો ઘાયલ થયા છે અને તેમને સારવાર માટે એસએમએસ હોસ્‍પિટલમાં લઈ જવામાં આવ્‍યા છે.

 મંત્રી કર્નલ રાજ્‍યવર્ધન સિંહ રાઠોડે કહ્યું કે તેઓ હોસ્‍પિટલ ગયા છે અને ઘાયલોને મળ્‍યા છે. રાજસ્‍થાનમાં કાયદાનું શાસન રહેશે. આરોપીઓ સામે કડક કાર્યવાહી કરવામાં આવશે.

કર્નલ રાઠોડે કહ્યું, ખીર વિતરણ કાર્યક્રમ દરમિયાન ભજન-કીર્તન ચાલી રહ્યું હતું. આ દરમિયાન ૨-૩ લોકો ત્‍યાં આવ્‍યા હતા અને પહેલા મોટા ખીરના માટલાને લાત મારી હતી અને પછી અપશબ્‍દો બોલવા લાગ્‍યા હતા. લોકોએ તેને સમજાવ્‍યો. આ દરમિયાન તેણે ૭-૮ લોકો પર છરી વડે હુમલો કર્યો હતો. હાલની સ્‍થિતિ એવી છે કે લોકોએ તેને ત્‍યાં પકડી લીધો અને તે હાલ પોલીસ કસ્‍ટડીમાં છે. તેની પૂછપરછ કરવામાં આવી રહી છે અને ઘાયલોની સ્‍થિતિ ખતરાની બહાર છે. સ્‍થિતિ નિયંત્રણમાં છે.

કુમારે કહ્યું કે કેટલાક શંકાસ્‍પદ લોકોની પૂછપરછ માટે અટકાયત કરવામાં આવી છે. રાજસ્‍થાન ભાજપના ભૂતપૂર્વ વડા અરુણ ચતુર્વેદીએ જણાવ્‍યું કે આરએસએસ શરદ પૂર્ણિમાના અવસર પર ખીર વહેંચવાનો કાર્યક્રમ આયોજિત કરી રહી હતી, જ્‍યાં અચાનક ચાકુ અને અન્‍ય હથિયારોથી સજ્જ હુમલાખોરોએ સભા પર હુમલો કર્યો અને લોકો પર હુમલો કરવાનું શરૂ કર્યું.

(9:51 AM IST)