News of Friday, 18th October 2024
ચીનની ખંધી ચાલથી શેરબજાર લોહીલુહાણ : લાખો કરોડ સ્વાહા !
ચીને ભારતીય શેરબજારનો કરચરઘાણવાળી દીધો : ડ્રેગને વિદેશી રોકાણકારો માટે ‘લાલજાજમ' પાથરતા તે તરફ વળ્યા નિવેશકો : પોતાની ઇકોનોમીને દોડવવા તથા રિયલ એસ્ટેટમાં પ્રાણ ફુંકવા ચીન રાહત પેકેજ ઉપર પેકેજ જાહેર કરી રહયું છે

નવી દિલ્હી, તા.૧૮: ભારતીય શેરબજારમાં ચાલી રહેલી વેચવાલી ધીમી પડવાના કોઈ સંકેત દેખાઈ રહ્યા નથી. શેરબજારમાં સતત ચોથા દિવસે ઘટાડો જારી રહ્યો હતો. સપ્તાહના છેલ્લા ટ્રેડિંગ દિવસે શુક્રવારે સેન્સેક્સ અને નિફ્ટી બંનેની શરૂઆત સાથે હંગામો થયો હતો. મોટા રોકાણકારોની સાથે નાના રિટેલ રોકાણકારો પણ ચિંતિત છે કે બજાર કયારે બાઉન્સ બેક કરશે. શેરબજારમાં આ સતત ઘટાડો કયાં સુધી ચાલુ રહેશે અને આ ઘટાડા પાછળ કોનો હાથ છે?
જો તમે પણ શેરબજારમાં પૈસા રોકો છો, તો છેલ્લા કેટલાક દિવસો તમારા પર ભારે રહ્યા હશે. બજાર સતત ઘટી રહ્યું છે. છેલ્લા કેટલાક દિવસોથી સેન્સેક્સ અને નિફ્ટી બંને સતત ઘટી રહ્યા છે. ઘણા લોકો બજારને લઈને વિવિધ અટકળો લગાવી રહ્યા છે. કેટલાક લોકો આ ઘટાડા પાછળનું કારણ ઈઝરાયેલ-ઈરાન યુદ્ધને માની રહ્યા છે, જ્યારે કેટલાક લોકો ક્રૂડ ઓઈલના ભાવમાં થયેલા વધારાને કારણ ગણાવી રહ્યા છે. આ બધાની વચ્ચે ઓસ્ટ્રેલિયન બ્રોકરેજ ફર્મે ભારતીય શેરબજારમાં સતત ઘટાડાનું મુખ્ય કારણ આપ્યું છે. આ ફર્મના મતે ભારતીય બજારોમાં ઘટાડા પાછળ પાડોશી દેશ ચીનની મોટી ભૂમિકા છે.
ગયા અઠવાડિયે આવા સમાચાર આવ્યા હતા, જેના પછી ભારતીય શેરબજાર સતત ઘટી રહ્યું છે. સમાચાર આવ્યા કે ચીને મોટી રમત રમી છે. જેની સીધી અસર ભારતીય બજાર અને રોકાણકારો પર જોવા મળી હતી. ડ્રેગન અહીં જ ન અટકયો, ચીને ફરી એ જ કામનું પુનરાવર્તન કરવાની તૈયારી કરી. દરમિયાન, ઓસ્ટ્રેલિયન બ્રોકરેજ ભારતીય બજારના ઘટાડા પાછળ ચીનના હાથ તરફ ઈશારો કરે છે. ચીને રોકાણકારોને આકર્ષવા માટે મોટા રાહત પેકેજની જાહેરાત કરી છે. આ રાહત પેકેજને કારણે ચીનના બજારોમાં તેજી જોઈને રોકાણકારો નફો મેળવવા માટે ત્યાં જવા લાગ્યા. વિદેશી રોકાણકારો (FII) ભારતીય શેરબજારમાંથી સતત નાણાં ઉપાડી રહ્યાં છે, જેના કારણે શેરબજાર ઘટી રહ્યું છે. જોકે, બ્રોકરેજ ફર્મના મતે લાંબા ગાળાના નફા માટે ભારત સૌથી પસંદગીનું બજાર છે.
ચીન સરકાર અન્ય રાહત પેકેજની જાહેરાત કરી શકે છે. રોકાણકારો આ રાહત પેકેજની રાહ જોઈ રહ્યા છે. બ્લૂમબર્ગના સર્વે રિપોર્ટ અનુસાર, ચાઈનીઝ માર્કેટમાં રોકાણ કરનારા રોકાણકારો અને વિશ્લેષકોને ચીન સરકાર તરફથી $૨૮૩ બિલિયનના રાહત પેકેજની અપેક્ષા છે. રોકાણકારો આ આશા પર નજર રાખી રહ્યા છે અને ભારતીય બજારમાંથી પૈસા કાઢીને ચીનમાં રોકાણ કરવાની તૈયારી કરી રહ્યા છે. જોકે, યુએસ પ્રમુખપદની ચૂંટણી અને ફેડરલ રિઝર્વની બેઠકના કારણે આ રાહત પેકેજમાં થોડો વિલંબ થઈ શકે છે. આ તમામ આશંકાઓ અંગે રોકાણકારો મૂંઝવણમાં છે. રોકાણકારો માટે ભારત અને ચીન વચ્ચે પસંદગી કરવી ‘મુશ્કેલ' બની રહી છે. તેમણે બંને બજારોના હકારાત્મક અને નકારાત્મક પાસાઓનું વિશ્લેષણ કર્યું.
અગાઉ સપ્ટેમ્બરમાં ચીને ૧૨ લાખ કરોડ રૂપિયાનું રાહત પેકેજ જાહેર કર્યું હતું. આ પેકેજ બાદ ચીનના શાંઘાઈ સ્ટોક એક્સચેન્જના માર્કેટ કેપમાં લગભગ ૨૬૯ લાખ કરોડ રૂપિયાનો વધારો થયો છે. તેનો ફાયદો ચીનને મળ્યો, જ્યારે ભારતને નુકસાન થયું. શેરબજારમાં ઘટાડાને કારણે રોકાણકારોના લાખો કરોડ રૂપિયાનું નુકસાન થયું છે. હવે તેઓ ત્રણ ગણું પેકેજ આપવાની વાત કરી રહ્યા છે, આવી સ્થિતિમાં ભારતીય બજાર પર ખતરો પણ બમણો થઈ શકે છે. ચીન રાહત પેકેજની જાહેરાત કરીને ભારતીય બજારને કામચલાઉ નુકસાન પહોંચાડી શકે છે. પરંતુ રિપોર્ટ અનુસાર લાંબા ગાળામાં ભારતનો દબદબો છે. ઓસ્ટ્રેલિયન બ્રોકરેજ ફર્મ મેક્વેરીએ જણાવ્યું હતું કે ચીનના રાહત પેકેજ જાહેર થયા બાદ તેની અર્થવ્યવસ્થા અને શેરબજારમાં મોટો નફો થયો છે. તમને જણાવી દઈએ કે ચીન તેની અર્થવ્યવસ્થાને પુનર્જીવિત કરવા અને રિયલ એસ્ટેટને પાટા પર લાવવા માટે રાહત પેકેજની જાહેરાત કરી રહ્યું છે.
જેમ જેમ વિદેશી રોકાણકારો ભારતીય બજારોમાંથી નાણાં ઉપાડવાનું શરૂ કરે છે કે તરત જ બજારમાં ઘટાડો થવા લાગે છે. FPIએ ઓક્ટોબરની શરૂઆતથી અત્યાર સુધીમાં લગભગ રૂ. ૨૦ હજાર કરોડ ઉપાડી લીધા છે. FII દ્વારા વેચવાલી વધવાના કારણે શેરબજારમાં ઘટાડો શરૂ થાય છે.
(3:07 PM IST)









છેલ્લા 8 દિવસમાં સૌથી લોકપ્રિય 
