મદ્રાસ હાઈકોર્ટે એકતરફી તલાક પર મહત્વનો ચુકાદો આપતા કહ્યું છે કે જો કોઈ મુસ્લિમ પતિ તલાક આપે અને પત્ની તેને સ્વીકારવાનો ઈન્કાર કરે તો કોર્ટ દ્વારા જ છૂટાછેડા સ્વીકારવામાં આવશે. જસ્ટિસ જીઆર સ્વામીનાથને કહ્યું કે, જો છૂટાછેડા પર વિવાદ છે તો કોર્ટને સંતુષ્ટ કરવાની જવાબદારી પતિની છે કે તેણે પત્નીને જે છૂટાછેડા આપ્યા છે તે કાયદા અનુસાર છે

    કોર્ટે એમ પણ કહ્યું કે જો કોઈ મુસ્લિમ પતિ બીજી પત્ની સાથે લગ્ન કરે તો તેની પહેલી પત્નીને તેની સાથે રહેવા માટે દબાણ કરી શકાય નહીં. મુસ્લિમ પર્સનલ લોમાં પુરૂષોને એકથી વધુ વખત લગ્ન કરવાની છૂટ છે. કોર્ટે કહ્યું, આમ છતાં પહેલી પત્નીને માનસિક પીડા થઈ શકે છે. જો પ્રથમ પત્ની પતિના બીજા લગ્ન સાથે અસંમત હોય, તો તે પતિ પાસેથી ભરણપોષણ મેળવવા માટે હકદાર છે. 

  પત્નીને વળતર આપવાના સેશન્સ કોર્ટના નિર્ણય સામે પતિની સિવિલ રિવ્યુ પિટિશન પર કોર્ટ સુનાવણી કરી રહી હતી. પત્નીએ 2018 માં તેના પતિ વિરુદ્ધ ઘરેલુ હિંસાનો કેસ દાખલ કર્યો હતો, જેના પર મેજિસ્ટ્રેટે પતિને પત્નીને વળતર તરીકે 5 લાખ રૂપિયા અને તેમના બાળકના ભરણપોષણ માટે દર મહિને 2500 રૂપિયા આપવાનો આદેશ આપ્યો હતો. પતિએ કહ્યું કે તેણે તેની પત્નીને ત્રણ વખત છૂટાછેડા આપી દીધા હતા, પરંતુ સેશન્સ કોર્ટે તે સ્વીકાર્યું ન હતું. કોર્ટે આદેશમાં કહ્યું કે જો પત્ની અસંમત હોય તો માત્ર કોર્ટ જ છૂટાછેડાની પુષ્ટિ કરી શકે છે, પતિ પોતે નહીં. 

    શરિયત કાઉન્સિલ દ્વારા આપવામાં આવેલા પ્રમાણપત્ર પર કોર્ટ ચોંકી ઉઠી હતી જેમાં પત્નીને તલાકમાં સહકાર ન આપવા બદલ દોષી ઠેરવવામાં આવ્યો હતો. કોર્ટે કહ્યું કે શરિયત કાઉન્સિલ દ્વારા આપવામાં આવેલ પ્રમાણપત્ર કાયદાકીય રીતે માન્ય નથી કારણ કે માત્ર કોર્ટ જ નિર્ણય આપી શકે છે.