નવી દિલ્હી :દિવાળીના તહેવાર પહેલા જ ભારત અને ચીન બંનેએ પૂર્વી લદ્દાખના ડેમચોક અને ડેપસાંગ વિસ્તારના સંઘર્ષ બિંદુઓ પરથી સૈનિકોને હટાવવાનું કામ પૂર્ણ કરી લીધું છે. હવે આ વિસ્તારોમાં સામાન્ય સ્થિતિ પુનઃસ્થાપિત કરવામાં આવી રહી છે અને ટૂંક સમયમાં નિયમિતપણે પેટ્રોલિંગ ચાલુ રહેશે.

    આવી સ્થિતિમાં કેન્દ્રીય મંત્રી કિરેન રિજિજુએ ભારત-ચીન સરહદ પર સ્થિત વાસ્તવિક નિયંત્રણ રેખા (LAC)ની મુલાકાત લીધી અને ભારતીય સૈનિકો સાથે મુલાકાત કરી. 

    આ દરમિયાન રિજિજુએ ચીની સૈનિકો સાથે પણ મુલાકાત કરી, જ્યાં તેમણે સરહદી વિસ્તારોમાં મુશ્કેલ હવામાન અને ત્યાંની સુવિધાઓ અંગે ચર્ચા કરી. આ મુલાકાત દરમિયાન રિજિજુએ ભારતીય સરહદી વિસ્તારોમાં થયેલા વિકાસ કાર્યોની પ્રશંસા કરી અને પોતાની પોસ્ટમાં કહ્યું કે દરેક ભારતીય આ વિકાસ જોઈને ગર્વ અનુભવશે. આ સકારાત્મક પગલાના ભાગરૂપે બંને દેશોના સૈનિકોએ દિવાળીના અવસર પર મીઠાઈની આપ-લે પણ કરી હતી, જે પરસ્પર સંબંધોમાં સુધારનું પ્રતીક માનવામાં આવે છે.