નવી દિલ્હી :વડાપ્રધાન મોદીએ શુક્રવારે કોંગ્રેસ પર નિશાન સાધ્યું હતું. તેમણે કહ્યું કે વિરોધ પક્ષ જનતા સમક્ષ 'ખરાબ રીતે ખુલ્લા' થઈ ગયો છે કારણ કે તે લોકોને આવા વચનો આપે છે, જેને તે પોતે જાણે છે કે તે પૂરા કરી શકશે નહીં. કોંગ્રેસ અધ્યક્ષ મલ્લિકાર્જુન ખડગેના નિવેદન પર મોદીએ વળતો પ્રહાર કર્યો છે.

    ખડગેએ કહ્યું હતું કે કોંગ્રેસ શાસિત રાજ્ય સરકારોએ આવા વચનો આપવા જોઈએ, જેનો બજેટમાં યોગ્ય રીતે સમાવેશ કરવામાં આવે અને જેના માટે પૈસાની કોઈ સમસ્યા ન હોય. ખડગેએ આ નિવેદન ત્યારે આપ્યું હતું જ્યારે હાલમાં જ કેટલાક સમાચારોમાં જણાવવામાં આવ્યું હતું કે કોંગ્રેસ શાસિત રાજ્યો તેમના ચૂંટણી વચનો પૂરા કરવામાં મુશ્કેલીઓનો સામનો કરી રહ્યા છે 

   વડાપ્રધાને કહ્યું કે, કોંગ્રેસ પાર્ટી જાણે છે કે ખોટા વાયદા કરવા આસાન છે. પરંતુ તેનો યોગ્ય રીતે અમલ કરવો ખૂબ જ મુશ્કેલ અથવા અશક્ય છે. તેઓ દરેક ચૂંટણીમાં લોકોને વચનો આપે છે, પરંતુ તેઓ તેને પૂરા કરી શકશે નહીં તે સારી રીતે જાણે છે. હવે તેઓ લોકોની સામે ખરાબ રીતે ખુલ્લા પડી ગયા છે. તેમણે કહ્યું કે હિમાચલ પ્રદેશ, કર્ણાટક અને તેલંગાણા જેવા કોંગ્રેસ શાસિત રાજ્યોમાં વિકાસ અને નાણાકીય સ્થિતિ દિવસેને દિવસે બગડી રહી છે. 

  મોદીએ લોકોને ચેતવણી આપતાં કહ્યું હતું કે તેમણે કોંગ્રેસના ખોટા વચનોથી સાવધાન રહેવું પડશે. તેમણે કહ્યું કે, તાજેતરમાં જ અમે જોયું કે હરિયાણાના લોકોએ તેમના જુઠ્ઠાણાને નકારી કાઢ્યા અને એવી સરકારને ચૂંટ્યા જે સ્થિર અને વિકાસલક્ષી હોય. તેમણે કહ્યું કે દેશભરમાં એવી સમજણ વધી રહી છે કે કોંગ્રેસને મત આપવાનો અર્થ છે શાસનનો અભાવ, નબળી અર્થવ્યવસ્થા અને અપાર લૂંટને મત આપવો. 

  ગરીબ, યુવાનો, ખેડૂતો અને મહિલાઓ રાજકીય રમતનો શિકાર બની રહ્યા છે' વડાપ્રધાને કહ્યું કે, કોંગ્રેસની ગેરંટી લાગુ કરવામાં આવી નથી, જે આ રાજ્યોની જનતા સાથે ભયંકર વિશ્વાસઘાત છે. તેમણે કહ્યું કે આવી રાજકીય રમતનો ભોગ ગરીબો, યુવાનો, ખેડૂતો અને મહિલાઓ બને છે. તેમને ન તો વચનોનો લાભ મળી રહ્યો છે કે ન તો વર્તમાન યોજનાઓ યોગ્ય રીતે ચલાવવામાં આવી રહી છે. કર્ણાટકમાં કોંગ્રેસ પાર્ટી આંતરિક રાજકારણ અને લૂંટફાટમાં વ્યસ્ત છે. વિકાસ પર ધ્યાન આપવાને બદલે કોંગ્રેસ હાલની યોજનાઓને રદ કરવાની યોજના બનાવી રહી છે. તેમણે કહ્યું કે હિમાચલ પ્રદેશમાં સરકારી કર્મચારીઓને તેમના પગાર સમયસર નથી મળી રહ્યા અને તેલંગાણાના ખેડૂતો તેમને આપેલા વચનની પૂર્તિની રાહ જોઈ રહ્યા છે.