સેન્સેક્સમાં ૯૦૦ પોઈન્ટનો કડાકો, ૫ કારણોથી બજારમાં ધબડકો
નવા રાષ્ટ્રપતિ ટ્રમ્પના નિર્ણયો સારા અને ખરાબ બંને સાબિત થઈ શકે છે
મુંબઇ, તા. ૭ : શેરબજારમાં સતત ઘટાડાનો માહોલ છે યુએસ ઈલેક્શનનું પરિણામ આવ્યાના બીજા જ દિવસે સેન્સેક્સમાં ૯૦૦ પોઈન્ટનો કડાકો જોવા મળ્યો છે. નિફ્ટી ઈન્ડેક્સ ૨૪૨૦૦ નીચે પહોંચી ગયો છે જ્યારે સેન્સેક્સ ૮૯૫૦૦ પર ચાલે છે. બુધવારે અમેરિકન ઈલેક્શનના દિવસે બજાર વધ્યું હતું પરંતુ આજે ફરીથી એક ટકા કરતા વધારે ઘટાડો થયો છે. બપોરે ર-૩૦ કલાકે સેન્સેકસ ૮૪૧ તો નીફટી ર૯ર પોઇન્ટ ડાઉન છે.
નિફ્ટી ૫૦ ઈન્ડેક્સમાં હિન્દાલ્કો ઈન્ડ. અદાણી એન્ટરપ્રાઈઝિસ, ગ્રાસિમ ઈન્ડસ્ટ્રીઝ, બજાજ ફિનસર્વ અને અલ્ટ્રાટેક સિમેન્ટ સૌથી વધારે ઘટયા હતા. એક્સપર્ટ્સના માનવા પ્રમાણે સેન્સેક્સ અને નિફ્ટીમાં ઘટાડો થવા માટે પાંચ કારણો જવાબદાર છે.
૧) અગાઉના બે સત્રમાં પુલ બેક રેલી આવ્યા પછી ઈન્વેસ્ટરો હાલમાં પ્રોફીટ બૂકિંગના માર્ગે છે. છેલ્લા બે દિવસમાં નિફ્ટી ઈન્ડેક્સ બે ટકા કરતા વધુ વધ્યો હતો અને પછી ઘટયો છે. જોકે, એક્સપર્ટ કહે છે કે બજારનો અંડરટોન હજુ પણ નબળો છે.
૨) ટ્રમ્પની પોલિસીઃ એનાલિસ્ટ્સ કહે છે કે ડોનાલ્ડ ટ્રમ્પની જીતના કારણે અમેરિકાની પોલિસીમાં વધારે પરિવર્તન જોવા મળશે. જિયોજિત ફાઈનાન્શિયલ સર્વિસિસના ચીફ ઈન્વેસ્ટમેન્ટ સ્ટ્રેટેજિસ્ટ ડો.વી કે વિજયકુમારે જણાવ્યું કે ટ્રમ્પના નિર્ણયો સારા અને ખરાબ બંને સાબિત થઈ શકે છે. તેઓ અમેરિકન ઈકોનોમીને મજબૂતબનાવશે પરંતુ તેમણે ચીનના માલ પર ૬૦ ટકા ટેરિફ અને બીજા દેશોના માલ પર ૧૦થી ૨૦ ટકા ટેરિફ નાખવાની વાત કરી છે. તેનાથી ફુગાવો વધશે અને યુએસ ફેડની મુસીબત વધી જશે.
૩) વ્યાજદરમાં કાપઃ ટ્રમ્પની ફુગાવો વધારે તેવી પોલિસીઓના કારણે યુએસ ફેડ દ્વારા વ્યાજદરમાં કાપની ગતિ ધીમી પડી જાય તેવી શકયતા છે. હાલમાં દુનિયાભરના સેન્ટ્રલ બેન્કો ટ્રમ્પની વાપસીની અસરનો અભ્યાસ કરે છે. તેના કારણે ડોલર મજબૂત બનશે અને વિકાસશીલ દેશો માટે ચિંતામાં વધારો થશે.
૪) ટેકનિકલ કારણોઃ નિફ્ટી ૫૦ ઈન્ડેક્સ અગાઉના દિવસની રેન્જમાં ખૂલ્યો હતો અને ગઈ કાલની સપાટી મેળવવાના પ્રયાસ પછી ઘટયો છે. ૨૪૫૦૦ના સ્તર પર નિફ્ટી ૫૦ ઈન્ડેક્સ સામે ઘણા અવરોધ છે. એન્જલ વનના એક્સપર્ટ્સ માને છે કે અત્યારે ખરીદી માટે ઉતાવળ ન કરવી જોઈએ અને બજાર ૨૪૫૦૦ની ઉપર જાય ત્યાં સુધી રાહ જોવી જોઈએ.
૫) એફઆઈઆઈનું સેલિંગઃ વિદેશી ફંડ્સ દ્વારા મોટા પાયે વેચવાલી ચાલુ છે જેની ભારતીય સ્ટોક માર્કેટ પર અસર થઈ છે. નવેમ્બરમાં છ દિવસની અંદર ઈન્ડિયન ઈક્વિટી માર્કેટમાંથી ૧૧,૦૦૦ રૂપિયા કરતા વધારે શેરની વેચવાલી થઈ છે. ઓક્ટોબર મહિનામાં પણ એફઆઈઆઈએ ૧.૧૪ લાખ કરોડના શેર વેચ્યા હતા.
(3:32 PM IST)
છેલ્લા 8 દિવસમાં સૌથી લોકપ્રિય 
