બ્રાઝિલના રિયો ડી જાનેરોમાં આયોજિત G-20 સમિટ દરમિયાન વડાપ્રધાન મોદીએ અમેરિકી રાષ્ટ્રપતિ બિડેન સાથે મુલાકાત કરી હતી. આ મુલાકાત દરમિયાન બંને નેતાઓ વચ્ચે સૌહાર્દપૂર્ણ અને સકારાત્મક વાતચીત થઈ હતી. વડાપ્રધાન મોદીએ બિડેનને કહ્યું કે, તમને મળીને હંમેશા આનંદ થાય છે.

  પીએમ મોદી અને રાષ્ટ્રપતિ બિડેન વચ્ચેની આ મુલાકાત મહત્વપૂર્ણ હતી, કારણ કે ભારત અને અમેરિકા વચ્ચે વ્યૂહાત્મક ભાગીદારી સતત વધી રહી છે. બંને નેતાઓએ દ્વિપક્ષીય સંબંધો, વેપાર, સુરક્ષા અને વૈશ્વિક મુદ્દાઓ પર ચર્ચા કરી હતી. આ બેઠકને ભારત-અમેરિકા સંબંધોને વધુ મજબૂત બનાવવાની દિશામાં એક મહત્વપૂર્ણ પગલું માનવામાં આવી રહ્યું છે

   આ પહેલા વડાપ્રધાન મોદીએ G-20 સમિટમાં પોતાના ભાષણમાં વૈશ્વિક આર્થિક પડકારો, જળવાયુ પરિવર્તન અને વૈશ્વિક સુરક્ષા મુદ્દાઓ વિશે વાત કરી હતી. તેમણે બેઠકમાં વિકાસશીલ દેશો માટે એકતા અને સહકારના મહત્વ પર ભાર મૂક્યો હતો. 

   કોન્ફરન્સ દરમિયાન વડાપ્રધાન મોદીએ  યુએન સેક્રેટરી જનરલ એન્ટોનિયો ગુટેરેસ સાથે પણ મુલાકાત કરી હતી. બંને નેતાઓ વચ્ચે વૈશ્વિક સુરક્ષા, જળવાયુ પરિવર્તન અને અન્ય મહત્વપૂર્ણ આંતરરાષ્ટ્રીય મુદ્દાઓ પર ચર્ચા થઈ હતી. વડાપ્રધાન મોદીએ ગુટેરેસ સાથે ભારતની ભૂમિકા અને સહયોગ વિશે પણ વાત કરી હતી.

  આ દરમિયાન પીએમ મોદી અન્ય ઘણા દેશોના રાષ્ટ્રપતિઓને પણ મળ્યા હતા. આ બેઠકોમાં ભારતના વૈશ્વિક નેતૃત્વ અને વિકાસશીલ દેશોના હિતોને આગળ વધારવા અંગે ચર્ચા કરવામાં આવી હતી. વડાપ્રધાન મોદીએ વિવિધ દેશો સાથેના દ્વિપક્ષીય સંબંધોને વધુ મજબૂત કરવા તેમજ વૈશ્વિક સમસ્યાઓના ઉકેલમાં ભારતની ભૂમિકા પર ભાર મૂક્યો હતો