નવી દિલ્‍હી, તા.૧૯: મહારાષ્‍ટ્ર વિધાનસભા ચૂંટણી ૨૦૨૪ના માત્ર એક દિવસ પહેલા નાસિકની એક હોટલમાંથી INR ૧.૯૮ કરોડની બિનહિસાબી રોકડ જપ્ત કરવામાં આવી હતી. ગેરકાયદે ચૂંટણી ભંડોળ અંગે ચિંતા ઊભી કરતી એક સૂચનાને પગલે દરોડા પાડવામાં આવ્‍યા હતા.

નાસિક જિલ્લા મેજિસ્‍ટ્રેટ જલજ શર્માએ જપ્તીની પુષ્ટિ કરતા જણાવ્‍યું હતું કે ખર્ચ નિરીક્ષક અને ટીમ આ મામલે વધુ તપાસ કરી રહી છે. આ ઘટનાએ ચૂંટણીના સમયગાળા દરમિયાન નાણાકીય ગેરરીતિઓની તપાસને તેજ બનાવી છે. ૨૦ નવેમ્‍બરે વિધાનસભાની ચૂંટણી માટે મતદાન થવાનું છે, સત્તાવાળાઓએ તકેદારી વધારી દીધી છે.

નાશિકના કલેક્‍ટરે કહ્યું કે રૂપિયા કયાંથી આવ્‍યા તેની ઉંડાણપૂર્વક તપાસ કરાશે. સાથે જ તેમણે કહ્યું કે હોટલના માલિકને નોટિસ આપી જવાબ માગશે, જો તે યોગ્‍ય જવાબ નહીં આપી શકે તો કડક પગલાં લેવામાં આવશે. તો આ અંગે એક્‍સપેન્‍ડિચર ઓબ્‍ઝર્વર અને તેની ટીમ મળી આવેલા રૂપિયાની તપાસમાં જોતરાશે. મહત્‍વનું છે કે અગાઉ પણ મહારાષ્‍ટ્રના વિવિધ સ્‍થળોએથી કરોડો રૂપિયા જપ્ત કરવામાં આવ્‍યા હતા.