નવી દિલ્હી તા.૧૯ :પેરિસથી દિલ્હી આવી રહેલી એર ઈન્ડિયાની ઈન્ટરનેશનલ ફ્લાઈટમાં એક ચોંકાવનારી ઘટના સામે આવી છે. પાયલોટે પોતાનો ડ્યુટી સમય પૂરો કરીને ફ્લાઈટ અધવચ્ચે છોડી દીધી હતી. જે બાદ નારાજ મુસાફરોએ એરપોર્ટ પર હંગામો મચાવ્યો હતો અને વૈકલ્પિક ફ્લાઇટની માંગ કરી હતી.

પેરિસથી દિલ્હી આવી રહેલી એર ઈન્ડિયાની ઈન્ટરનેશનલ ફ્લાઈટમાં સોમવારે એક વિચિત્ર સ્થિતિ સર્જાઈ જ્યારે પાઈલટ પોતાનો ડ્યૂટી ટાઈમ પૂરો થવાને કારણે જયપુરમાં ફ્લાઈટમાંથી નીકળી ગયો. પાયલોટે કહ્યું કે તેની ફરજના કલાકો પૂરા થઈ ગયા છે. ફ્લાઇટમાં સવાર 180થી વધુ મુસાફરો જયપુર એરપોર્ટ પર 9 કલાક સુધી પરેશાન રહ્યા હતા. આ પછી તેને રોડ માર્ગે દિલ્હી મોકલવામાં આવ્યો હતો.

તમને જણાવી દઈએ કે આ ફ્લાઈટ એર ઈન્ડિયાની AI-2022 હતી, જે રવિવારે રાત્રે 10 વાગ્યે પેરિસથી દિલ્હી માટે રવાના થઈ હતી. ફ્લાઇટનો નિર્ધારિત સમય સવારે 10:35નો હતો, પરંતુ ખરાબ હવામાનને કારણે પ્લેન દિલ્હીમાં ઉતરી શક્યું ન હતું. આ પછી, એર ટ્રાફિક કંટ્રોલ (ATC)ની સૂચના પર, પાયલટે ફ્લાઇટને જયપુરમાં લેન્ડ કરાવ્યું, જ્યાં તે બપોર સુધી ફ્લાઈટ માટે ક્લિયરન્સની રાહ જોતો રહ્યો. જ્યારે ક્લિયરન્સ મેળવવામાં વિલંબ થયો હતો અને પાઇલટની ફરજનો સમય પૂરો થઈ ગયો હતો, ત્યારે તેણે ફ્લાઈટ છોડી દીધી હતી, અને બોર્ડ પરના તમામ મુસાફરોને કોઈ સ્પષ્ટ ઉકેલ વિના રાહ જોવા માટે છોડી દીધા હતા.

ગુસ્સે ભરાયેલા મુસાફરોએ એરપોર્ટ પર હંગામો મચાવ્યો હતો અને વૈકલ્પિક ફ્લાઈટની માંગણી કરી હતી, પરંતુ એરલાઈન્સ દ્વારા કોઈ નક્કર પગલાં લેવામાં આવ્યા ન હતા. જયપુર એરપોર્ટ પર લગભગ 9 કલાક સુધી 180થી વધુ મુસાફરોને મુશ્કેલીનો સામનો કરવો પડ્યો હતો. જો કે, આ સમયગાળા દરમિયાન, એરપોર્ટ ઓથોરિટીએ મુસાફરોનો અસંતોષ દૂર કરવા માટે તેમને ભોજન અને અન્ય સુવિધાઓ પૂરી પાડી હતી. આ પછી કેટલાક મુસાફરો પોતાના અંગત વાહનોમાં દિલ્હી જવા રવાના થયા હતા. જ્યારે કેટલાકને એરલાઈન્સ કંપની દ્વારા બસ મારફતે દિલ્હી મોકલવામાં આવ્યા હતા.