મહારાષ્ટ્રમાં મહાયુતિની જોરદાર જીત બાદ હવે સૌથી મોટો સવાલ મુખ્યમંત્રી પદને લઈને છે. ભાજપ, શિવસેના (શિંદે જૂથ) અને એનસીપીના ગઠબંધનને બે તૃતિયાંશથી વધુ બહુમતી મળી છે. જોકે, ચૂંટણીના પરિણામો બાદ મુખ્યમંત્રી પદને લઈને વિવાદના અહેવાલો સામે આવ્યા હતા. હવે શિવસેના પ્રમુખ એકનાથ શિંદે અને NCP નેતા અજિત પવારના નિવેદનો બાદ ચિત્ર ઘણી હદ સુધી સ્પષ્ટ થઈ ગયું છે.

   NCP નેતા અજિત પવારે મોટો સંકેત આપ્યો છે. તેમણે કહ્યું કે ગુરુવારે દિલ્હીમાં મહાયુતિના ટોચના નેતાઓની બેઠક થશે, જેમાં મુખ્યમંત્રી પદને લઈને અંતિમ નિર્ણય લેવામાં આવશે. પવાર પહેલા જ દેવેન્દ્ર ફડણવીસને સમર્થન આપવાની વાત કરી ચૂક્યા છે. તેમણે ANIને કહ્યું, "તમામ ચર્ચા ગુરુવારે દિલ્હીમાં થશે અને અંતિમ નિર્ણય તે જ દિવસે લેવામાં આવશે."

   ગુરુવારે મહાયુતિના વરિષ્ઠ નેતાઓ દિલ્હીમાં એક બેઠક કરશે, જેમાં મુખ્યમંત્રી પદની ઔપચારિક જાહેરાત કરવામાં આવશે. આ પહેલા મુંબઈમાં બીજેપી વિધાયક દળની બેઠક યોજાશે, જેમાં ધારાસભ્યો પાસેથી સલાહ લેવામાં આવશે 

   સૂત્રોના જણાવ્યા અનુસાર, મહાયુતિના ત્રણેય ઘટક પક્ષો - ભાજપ, શિવસેના (શિંદે જૂથ), અને એનસીપી - દેવેન્દ્ર ફડણવીસના નામ પર સહમત છે. અજિત પવાર અને એકનાથ શિંદે બંનેએ ફડણવીસના નેતૃત્વમાં કામ કરવાની ઈચ્છા વ્યક્ત કરી છે. 

    શિવસેનાના નેતા અને વર્તમાન મુખ્યમંત્રી એકનાથ શિંદેએ બુધવારે સ્પષ્ટ કર્યું કે તેઓ ભાજપના નિર્ણયને સંપૂર્ણ રીતે સ્વીકારશે. તેમણે કહ્યું કે, "ભાજપ હાઈકમાન્ડ જે પણ નિર્ણય લેશે તે અમે સ્વીકારીશું. આ સરકાર જનતા અને સામાન્ય માણસની સરકાર છે." આ નિવેદન સાથે શિંદેએ મુખ્યમંત્રી પદ માટે ચાલી રહેલી ખેંચતાણનો અંત કર્યો છે અને મહાગઠબંધનમાં સૌહાર્દનો સંદેશ આપ્યો છે. 

   મહાયુતિને વિધાનસભામાં જંગી બહુમતી મળી છે. ભાજપઃ 132 બેઠકો શિવસેના (શિંદે જૂથ): 57 બેઠકો NCP (અજિત પવાર જૂથ): 41 બેઠકો

   કુલ 288 સભ્યોની વિધાનસભામાં બહુમત માટે 145 બેઠકો જરૂરી છે, જ્યારે મહાયુતિ પાસે 230 બેઠકો છે, જે બહુમતી કરતા ઘણી વધારે છે.