નવી દિલ્હી. કેન્દ્રીય ગૃહ પ્રધાન અમિતભાઈ  શાહે આગામી વર્ષે 31 માર્ચ સુધીમાં હરિયાણામાં નવા ફોજદારી કાયદાનો 100 ટકા અમલ કરવા જણાવ્યું છે. અમિતભાઈ  શાહે મંગળવારે હરિયાણાના મુખ્યમંત્રી નાયબ સિંહ સૈનીની હાજરીમાં રાજ્યમાં ત્રણ નવા ફોજદારી કાયદાના અમલીકરણ અંગે સમીક્ષા બેઠકની અધ્યક્ષતા કરી હતી.

  બેઠકમાં હરિયાણામાં પોલીસ, જેલ, કોર્ટ, પ્રોસિક્યુશન અને ફોરેન્સિક સંબંધિત વિવિધ નવી જોગવાઈઓના વર્તમાન પરિસ્થિતિ અને અમલીકરણની સમીક્ષા કરવામાં આવી હતી. આ બેઠકમાં કેન્દ્રીય ગૃહ સચિવ, હરિયાણાના મુખ્ય પ્રધાનના મુખ્ય અગ્ર સચિવ, રાજ્યના મુખ્ય સચિવ અને પોલીસ મહાનિર્દેશક, પોલીસ બ્યુરોના મહાનિર્દેશક અને કેન્દ્રીય ગૃહ મંત્રાલય અને રાજ્ય સરકારના અનેક વરિષ્ઠ અધિકારીઓએ હાજરી આપી હતી.

  બેઠકમાં ચર્ચા દરમિયાન કેન્દ્રીય ગૃહમંત્રીએ કહ્યું કે ત્રણ નવા ફોજદારી કાયદા નાગરિક અધિકારોનું રક્ષણ કરવા અને ન્યાયની પહોંચ પૂરી પાડવાનો આધાર બની રહ્યા છે. ટેક્નોલોજીના ઉપયોગ પર ભાર મૂકતા અમિત શાહે કહ્યું કે રાજ્યના દરેક જિલ્લામાં એકથી વધુ ફોરેન્સિક મોબાઈલ વાન ઉપલબ્ધ હોવી જોઈએ. 

  તેમણે ભારપૂર્વક જણાવ્યું હતું કે ઝીરો એફઆઈઆર પર દેખરેખ રાખવાની જવાબદારી નાયબ પોલીસ અધિક્ષક સ્તરના અધિકારીની હોવી જોઈએ અને રાજ્યો અનુસાર અન્ય ભાષાઓમાં તેમના અનુવાદની ખાતરી કરવી જોઈએ. 

  કેન્દ્રીય ગૃહમંત્રીએ નવા કાયદાઓની સમીક્ષા કરવાનો આદેશ આપ્યો ગૃહમંત્રીએ કહ્યું કે રાજ્યના પોલીસ મહાનિર્દેશકે તમામ પોલીસકર્મીઓને કહેવું જોઈએ કે સમયસર ન્યાય આપવો એ તેમની પ્રાથમિકતા છે. તેમણે કહ્યું કે હરિયાણાના મુખ્યમંત્રીએ દર 15 દિવસે ત્રણ નવા કાયદાના અમલીકરણની પ્રગતિની સમીક્ષા કરવી જોઈએ અને મુખ્ય સચિવ અને પોલીસ મહાનિર્દેશકે અઠવાડિયામાં એકવાર તમામ સંબંધિત વિભાગોના અધિકારીઓ સાથે મુલાકાત કરવી જોઈએ.