<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Wednesday, 11th December 2024

એક્‍સાઇઝ પોલિસી કેસમાં મનીષ સિસોદિયાને રાહત :સુપ્રીમ કોર્ટે જામીનની શરતો હળવી કરી

રાહત મળ્‍યા બાદ ટ્‍વિટ કરીને કોર્ટનો આભાર માન્‍યો

નવી દિલ્‍હી, તા.૧૧: મનીષ સિસોદિયાને સુપ્રીમ કોર્ટમાંથી રાહત મળી છે. SCએ એક્‍સાઇઝ પોલિસી કેસ સંબંધિત ભ્રષ્ટાચાર અને મની લોન્‍ડરિંગ કેસમાં જામીનની શરતોમાં ફેરફારની તેમની માંગને મંજૂરી આપી હતી. જામીનની શરતો અનુસાર તેને અઠવાડિયામાં બે વખત તપાસ એજન્‍સીઓની ઓફિસમાં હાજર રહેવું પડતું હતું. સિસોદિયાની વિનંતી પર કોર્ટે આજે આ શરત હટાવી હતી. આ શરત જામીન સમયે આપવામાં આવેલી શરતોમાંની એક હતી. જોકે, કોર્ટે સિસોદિયાને ટ્રાયલમાં નિયમિત હાજર રહેવા કહયું છે.

સુપ્રીમ કોર્ટમાંથી રાહત મળ્‍યા બાદ મનીષ સિસોદિયાએ કોર્ટનો આભાર માન્‍યો હતો. તેમણે X પર પોસ્‍ટ કરીને કહ્‍યું કે તેઓ માનનીય સુપ્રીમ કોર્ટના હૃદયપૂર્વક આભાર માને છે, જેણે જામીનની શરત દૂર કરીને રાહત આપી છે. આ નિર્ણય માત્ર ન્‍યાયતંત્રમાં મારો વિશ્વાસ વધુ મજબૂત બનાવતો નથી, પરંતુ આપણા બંધારણીય મૂલ્‍યોની મજબૂતાઈ પણ દર્શાવે છે. હું હંમેશા ન્‍યાયતંત્ર અને બંધારણ પ્રત્‍યેની મારી ફરજોનું સન્‍માન કરીશ.

આ વર્ષે ઓગસ્‍ટમાં, સુપ્રીમ કોર્ટે સિસોદિયાને હવે બંધ થઈ ગયેલી દિલ્‍હી એક્‍સાઈઝ પોલિસીના સંબંધમાં સેન્‍ટ્રલ બ્‍યુરો ઓફ ઈન્‍વેસ્‍ટિગેશન (CBI) અને એન્‍ફોર્સમેન્‍ટ ડિરેક્‍ટોરેટ (ED) દ્વારા નોંધાયેલા કેસમાં જામીન આપ્‍યા હતા. અદાલતે તેમની અરજી સ્‍વીકારી હતી, અવલોકન કર્યું હતું કે ટ્રાયલમાં લાંબો વિલંબ એ ઝડપી સુનાવણીના અધિકારનું ઉલ્લંઘન છે જે બંધારણની કલમ ૨૧ હેઠળ સ્‍વતંત્રતાનું એક પાસું છે.

સિસોદિયા ૨૬ ફેબ્રુઆરી ૨૦૨૩ થી આ વર્ષે ઓગસ્‍ટમાં જામીન મળ્‍યા ત્‍યાં સુધી કસ્‍ટડીમાં હતા. સિસોદિયાએ આ કેસમાં શરૂઆતમાં ઘણી જામીન અરજીઓ કરી હતી, પરંતુ કોઈ ફાયદો થયો ન હતો, પરંતુ આખરે ઓગસ્‍ટમાં તેમને જામીન મળી ગયા હતા.(

(3:08 PM IST)