નવી દિલ્હી : શ્રીલંકાના રાષ્ટ્રપતિ બન્યા બાદ ભારતની પ્રથમ મુલાકાતે દિલ્હી પહોંચેલા અનુરા કુમારા દિસનાયકેએ સોમવારે વડાપ્રધાન નરેન્દ્ર મોદી સાથે દ્વિપક્ષીય અને પ્રતિનિધિમંડળ સ્તરની વાતચીત કરી હતી. આ બેઠક દરમિયાન બંને દેશો વચ્ચે ઘણા મહત્વપૂર્ણ સમજૂતી કરાર (એમઓયુ) પર હસ્તાક્ષર કરવામાં આવ્યા હતા.

  આ અવસર પર પીએમ મોદીએ શ્રીલંકાના વિકાસમાં ભારતના યોગદાનનો ઉલ્લેખ કરતા કહ્યું કે, 'ભારતે શ્રીલંકાને 5 બિલિયન ડોલરની ક્રેડિટ લાઇન અને અન્ય નાણાકીય સહાય આપી છે. ભારત શ્રીલંકાના તમામ 25 જિલ્લાના વિકાસ કાર્યોમાં સહયોગ કરી રહ્યું છે. પીએમ મોદીએ કહ્યું કે શ્રીલંકા મહો-અનુરાધાપુરા રેલ્વે સિગ્નલિંગ સિસ્ટમ અને કનકેસંથુરાઈ પોર્ટના વિકાસ કાર્યમાં આર્થિક મદદ કરશે.

   શ્રીલંકાના રાષ્ટ્રપતિ દિસાનાયકે સાથે જારી કરવામાં આવેલા તેમના સંયુક્ત નિવેદનમાં પીએમ મોદીએ કહ્યું કે બંને દેશો માને છે કે કોલંબો સુરક્ષા કોન્ક્લેવ પ્રાદેશિક શાંતિ, સુરક્ષા અને વિકાસ માટે એક મહત્વપૂર્ણ પ્લેટફોર્મ છે. તેમણે કહ્યું, 'અમે સંપૂર્ણ રીતે ઓળખીએ છીએ કે અમારા સુરક્ષા હિતો એકબીજા સાથે જોડાયેલા છે. અમે અમારા સંરક્ષણ સહયોગ કરારને ઝડપથી અંતિમ સ્વરૂપ આપવા સંમત થયા છીએ. અમે દરિયાઈ સુરક્ષા, આતંકવાદ વિરોધી, સાયબર સુરક્ષા, દાણચોરી અને સંગઠિત અપરાધમાં અમારો સહયોગ વધારશું. આ સિવાય હાઈડ્રોગ્રાફી પર સહયોગ માટે સમજૂતી થઈ છે. 

    ભારત અને શ્રીલંકાના લોકો વચ્ચેના સંબંધોના ઊંડાણનો ઉલ્લેખ કરતા વડાપ્રધાન મોદીએ કહ્યું કે આ સંબંધો આપણી સભ્યતા સાથે જોડાયેલા છે. જ્યારે ભારતમાં પાલી ભાષાને 'શાસ્ત્રીય ભાષા' તરીકે માન્યતા આપવામાં આવી હતી, ત્યારે શ્રીલંકામાં પણ તેની ઉજવણી કરવામાં આવી હતી. વડાપ્રધાને કહ્યું કે બંને પક્ષોએ આર્થિક ભાગીદારી માટે રોકાણ આધારિત વિકાસ અને કનેક્ટિવિટી પર ધ્યાન કેન્દ્રિત કરવાનો નિર્ણય કર્યો છે. તેમણે કહ્યું, 'અમે નક્કી કર્યું છે કે ભૌતિક, ડિજિટલ અને ઉર્જા કનેક્ટિવિટી અમારા સહયોગના મુખ્ય સ્તંભ હશે.' 

   મોદીએ જણાવ્યું હતું કે બંને દેશો વચ્ચે પાવર ગ્રીડ કનેક્ટિવિટી અને મલ્ટિ-પ્રોડક્ટ પેટ્રોલિયમ પાઇપલાઇન સ્થાપિત કરવા અને શ્રીલંકાના પાવર પ્લાન્ટ્સને લિક્વિફાઇડ નેચરલ ગેસ (LNG)ની સપ્લાય કરવા માટે કામ કરવામાં આવશે. બંને દેશો વચ્ચે કનેક્ટિવિટી સુધારવા માટે, રામેશ્વરમ અને તાલાઈમાનર વચ્ચે ફેરી સર્વિસ શરૂ કરવામાં આવશે. મોદીએ કહ્યું, 'અમે માછીમારોની આજીવિકા સાથે જોડાયેલા મુદ્દાઓ પર પણ ચર્ચા કરી. અમે સંમત છીએ કે અમારે આ મામલે માનવતાવાદી અભિગમ અપનાવવો જોઈએ.' તમિલ મુદ્દાનો ઉલ્લેખ કરતા તેમણે કહ્યું કે ભારતને આશા છે કે શ્રીલંકાની સરકાર સમુદાયની આકાંક્ષાઓને પૂર્ણ કરશે