મુંબઈ : સોના-ચાંદીના ભાવમાં સતત ઘટાડો જોવા મળી રહ્યો છે. ભાવ ઘટવાને કારણે તેને ખરીદવાની સુવર્ણ તક બની ગઈ છે. દિલ્હીમાં 24 કેરેટ સોનાની કિંમત 1,150 રૂપિયા ઘટીને 78,350 રૂપિયા પ્રતિ 10 ગ્રામ થઈ ગઈ છે. આ ઘટાડો 99.9 ટકા શુદ્ધતાના સોનાના ભાવમાં નોંધાયો હતો. જ્યારે આ પહેલા શુક્રવારે સોનાનો ભાવ 79,500 રૂપિયા પ્રતિ 10 ગ્રામ હતો.ચાંદીના ભાવમાં પણ 300 રૂપિયાનો ઘટાડો થયો હતો અને તે હવે 92,500 રૂપિયા પ્રતિ કિલો થઈ ગયો છે.

    નિષ્ણાતોનું માનવું છે કે સોનાના ભાવમાં વધઘટનું મુખ્ય કારણ મધ્ય પૂર્વમાં વધી રહેલું રાજકીય તણાવ અને વૈશ્વિક આર્થિક સ્થિતિ છે. HDFC સિક્યોરિટીઝના વરિષ્ઠ વિશ્લેષક સૌમિલ ગાંધી કહે છે કે ઈઝરાયેલ અને ગલ્ફ દેશો વચ્ચેના સંઘર્ષ અને અમેરિકન અર્થતંત્રમાં અનિશ્ચિતતાને કારણે આંતરરાષ્ટ્રીય સ્તરે પણ સોનાની માંગ પર અસર થઈ રહી છે.

  સોનાના ભાવમાં ઘટાડાનું બીજું કારણ વૈશ્વિક બજારોમાં ડોલરની મજબૂતાઈ અને વ્યાજદરમાં સંભવિત ફેરફારો છે. વર્લ્ડ ગોલ્ડ કાઉન્સિલ (WGC)ના રિપોર્ટ અનુસાર 2025 સુધીમાં સોનાના ભાવમાં ઘટાડો જોવા મળી શકે છે 

  સોના-ચાંદીના વાયદા બજારમાં હલચલ ચાલુ છે. સોમવારે, MCX પર ફેબ્રુઆરી ડિલિવરી માટેનો સોનાનો કોન્ટ્રાક્ટ રૂ. 143 વધીને રૂ. 77,279 પ્રતિ 10 ગ્રામ પર ટ્રેડ થઈ રહ્યો હતો. દિવસ દરમિયાન સોનું રૂ.76,904ની નીચી સપાટી અને રૂ.77,295ની ઊંચી સપાટીએ પહોંચ્યું હતું ચાંદીનો માર્ચ ડિલિવરી કોન્ટ્રાક્ટ રૂ. 319 વધીને રૂ. 91,320 પ્રતિ કિલોએ પહોંચ્યો હતો. 

  આંતરરાષ્ટ્રીય બજારોમાં પણ સોના અને ચાંદીના ભાવમાં ચાલ જોવા મળી હતી. કોમેક્સ ગોલ્ડ ફ્યુચર્સ $2.70 અથવા 0.10 ટકા વધીને $2,678.50 પ્રતિ ઔંસ પર જોવા મળ્યું હતું.  એશિયન ટ્રેડિંગ સેશનમાં, ચાંદીનો ભાવ ઔંસ દીઠ $ 31.11 નોંધાયો હતો.

    વર્લ્ડ ગોલ્ડ કાઉન્સિલનું માનવું છે કે 2025માં સોના અને ચાંદીના ભાવ સ્થિર થઈ શકે છે. જોકે, યુએસ પ્રમુખ ડોનાલ્ડ ટ્રમ્પના બીજા કાર્યકાળમાં વેપાર યુદ્ધ અને આર્થિક વૃદ્ધિ અંગેની અનિશ્ચિતતાને કારણે સોનાની માંગમાં વધારો થવાની સંભાવના છે.