નવી દિલ્હી :દેશના મોટાભાગના વિસ્તારોમાં ઠંડીનું વાતાવરણ અને કોલ્ડવેવની સ્થિતિ પ્રવર્તી રહી છે. ભારતના ઉત્તર-પશ્ચિમ અને મધ્ય ભાગો સૌથી વધુ પ્રભાવિત હોવાનું કહેવાય છે. ભારતીય હવામાન વિભાગે આજે ભારતના ઘણા વિસ્તારોમાં શીત લહેર અને ગાઢ ધુમ્મસની આગાહી કરી છે. ઘણા રાજ્યોમાં તાપમાન 10 ડિગ્રી સેલ્સિયસથી નીચે ગયું હોવાથી નાગરિકોને હવામાનની સ્થિતિ પર નજીકથી નજર રાખવાની સલાહ આપવામાં આવે છે.

ત્રણ-ચાર દિવસ ઠંડા પવનો ફૂંકવાના કારણે રાજ્યમાં ઠંડીનો ચમકારો જોવા મળ્યો હતો. જોકે લઘુત્તમ અને મહત્તમ તાપમાનમાં ઘટાડો થવાથી આજે ઠંડીમાં ઘટાડો જોવા મળ્યો છે. જોકે રાત્રીના સમયે અને વહેલી સવારે દિવસ કરતા વધું ઠંડી અનુભવાઈ હતી. આજે અમદાવાદ શહેરમાં મહત્તમ તાપમાન 29.6 ડિગ્રી જ્યારે લઘુત્તમ તાપમાન 14 ડિગ્રી નોંધાયું હતું. 7.8 ડિગ્રી લઘુત્તમ તાપમાન સાથે નલિયા સૌથી ઠંડુ શહેર રહ્યું છે.

IMDએ આગાહી કરી છે કે મધ્યપ્રદેશના વિવિધ ભાગોમાં શીત લહેરથી લઈને તીવ્ર શીત લહેર સુધીની સ્થિતિ જોવા મળી શકે છે. જ્યારે હરિયાણા-ચંદીગઢ-દિલ્હી, જમ્મુ કાશ્મીર-લદ્દાખ-ગિલગિટ-બાલ્ટિસ્તાન-મુઝફ્ફરાબાદ, હિમાચલ પ્રદેશ, પંજાબ, ઉત્તર પ્રદેશ, રાજસ્થાન, વિદર્ભ, ઓડિશા, મધ્ય મહારાષ્ટ્ર, મરાઠવાડા, સૌરાષ્ટ્ર અને કચ્છ અને તેલંગાણાના વિવિધ વિસ્તારોમાં શીત લહેર જોવા મળી રહી છે. આ ઉપરાંત પશ્ચિમ મધ્યપ્રદેશના વિવિધ ભાગોમાં ઠંડીના દિવસોની આગાહી કરવામાં આવી છે.

હિમાલયમાંથી આવતા ઠંડા પવનોને કારણે ભારતમાં શીત લહેર ખાસ કરીને ઉત્તર અને મધ્ય પ્રદેશોમાં જોવા મળે છે. ભારતીય હવામાન વિભાગ શીત લહેર જાહેર કરે છે જ્યારે મેદાનોમાં લઘુત્તમ તાપમાન 10 ડિગ્રી અથવા ઓછું થઈ જાય છે અને સામાન્ય કરતાં 4.5 ડિગ્રીથી વધુ હોય છે અથવા જ્યારે તાપમાન 0 ડિગ્રીથી નીચે જાય છે.

દિલ્હીની વાત કરીએ તો દિલ્હીમાં સોમવારે પણ ઠંડીનો પ્રકોપ ચાલુ રહ્યો હતો અને તાપમાનનો પારો 5 ડિગ્રી સેલ્સિયસ પર રહ્યો હતો. રવિવારે દિલ્હીનું લઘુત્તમ તાપમાન 4.9 ડિગ્રી સેલ્સિયસ પર પહોંચ્યું હતું, જે સામાન્ય કરતાં 3.1 ડિગ્રી ઓછું હતું. IMD અનુસાર,લઘુત્તમ તાપમાન 5 ડિગ્રી સેલ્સિયસ અને મહત્તમ 23 ડિગ્રી સેલ્સિયસ રહેવાની સંભાવના છે. ધુમ્મસની પણ આગાહી કરવામાં આવી છે.

પડોશી હરિયાણામાં, હિસારમાં લઘુત્તમ તાપમાન 1.7 ડિગ્રી સેલ્સિયસ અને નારનૌલમાં 3 ડિગ્રી સેલ્સિયસ લઘુત્તમ તાપમાન નોંધાયું હતું. ભિવાનીમાં લઘુત્તમ તાપમાન 4 ડિગ્રી સેલ્સિયસ, ગુરુગ્રામમાં 5.6 ડિગ્રી સેલ્સિયસ, રોહતકમાં 5.2 ડિગ્રી સેલ્સિયસ અને અંબાલામાં 5.7 ડિગ્રી સેલ્સિયસ નોંધાયું હતું.