વારાણસી, તા.૧૯: વારાણસીની તાજ હોટેલમાંથી એક ચોંકાવનારો કિસ્‍સો સામે આવ્‍યો છે. જ્‍યાં એક યુવક ચાર દિવસ સુધી ત્‍યાં રોકાયો, તમામ સુવિધાઓનો લાભ લીધો, પરંતુ જ્‍યારે બિલ આપવાનો વારો આવ્‍યો તો ફરાર થઈ ગયો. લગભગ ૨ લાખનું બિલ ચૂકવ્‍યા વિના જ યુવક ફરાર થઈ જતાં હોટેલના મેનેજરે પોલીસ ફરિયાદ નોંધાવી છે. મેનેજરની ફરિયાદ બાદ, પોલીસ સીસીટીવીના આધારે આ ફરાર યુવકની શોધખોળમાં લાગી છે.

વારાણસીના નદેસર વિસ્‍તારમાં સ્‍થિત હોટેલ તાજ ગંગેઝથી આ ચોંકાવનારો બનાવ સામે આવ્‍યો છે. જ્‍યાં હાઇ સિકયોરિટીની અને સંપૂર્ણ સુવિધાથી સજ્જ હોટેલની એક ઠગે ૨ લાખ રૂપિયાનો ચૂનો લગાવી દીધો છે.

મળતી માહિતી મુજબ, ઓડિશાનો રહેવાસી સાર્થક સંજય ૧૪ ઓક્‍ટોબરથી લઈને ૧૮ ઓક્‍ટોબર સુધી હોટેલના રૂમ નંબર ૧૨૭માં રોકાયો હતો. જેનું ભાડું ૧,૬૭,૭૯૬ રૂપિયા થયું હતું. આ સિવાય તેણે હોટેલમાં ભોજન પણ લીધું હતું, જેની કિંમત ૩૬, ૭૫૦ રૂપિયા હતી. આ પ્રકારે કુલ, ૨,૦૪,૫૨૧ રૂપિયાનું બિલ થયું હતું. પરંતુ, યુવક બિલ ચૂકવ્‍યા વિના જ રૂમ મૂકીને ગાયબ થઈ ગયો. જ્‍યારે તેના રૂમની તપાસ કરવામાં આવી તો તેમાંથી ફક્‍ત થોડા કપડાં જ મળ્‍યા. ત્‍યારબાદ હોટેલના ફ્રન્‍ટ ઓફિસ મેનેજર ઋષિ મુખર્જીએ આ મામલે સંબંધિત કેન્‍ટ પોલીસ સ્‍ટેશનમાં ફરિયાદ કરી હતી.

સમગ્ર મામલે કેન્‍ટ સર્કલના એસીપી વિદુષ સક્‍સેનાએ જણાવ્‍યું કે, ફરિયાદ મળ્‍યા બાદ જ્‍ત્‍ય્‍ નોંધવામાં આવી છે. સીસીટીવ ફૂટેજ અને અન્‍ય જાણકારી મેળવવામાં આવી રહી છે. આરોપીને પકડવા માટે ટીમ ગોઠવવામાં આવી છે. જલ્‍દીથી તેને પકડવામાં આવશે. હાલ, જે સીસીટીવી ફૂટેજ ચેક કરવામાં આવ્‍યા તેમાં યુવક હોટેલમાં આંટા-ફેરા મારતો જોવા મળી રહ્યો છે.