નવી દિલ્‍હી,  તા.૨૫: ડિસેમ્‍બરનું અંતિમ સપ્‍તાહ છે અને ઉત્તર ભારતમાં ઠંડીએ જોર પકડયું છે. વેસ્‍ટર્ન ડિસ્‍ટર્બન્‍સની અસરને કારણે પહાડોમાં હિમવર્ષા શરૂ થઈ ગઈ છે અને મેદાની વિસ્‍તારોમાં વરસાદ શરૂ થઈ ગયો છે. તે જ સમયે, સૂર્ય સંતાવાનું શરૂ કર્યું છે, જેના કારણે તાપમાનમાં ઘટાડો જોવા મળી રહ્‍યો છે. આજે, ૨૫ ડિસેમ્‍બરે, લદ્દાખમાં તાપમાન માઈનસ ૨૦ થઈ ગયું છે, જ્‍યારે હિમાચલ પ્રદેશમાં તે ઘટીને માઈનસ ૧૦ થઈ ગયું છે.

દેશમાં આજે સૌથી ઠંડુ શહેર લદ્દાખનું ન્‍યોમા છે, જ્‍યાં તાપમાન માઈનસ ૨૦.૩ હતું. તે જ સમયે, હિમાચલના તાબોમાં તાપમાન માઈનસ ૧૦.૬ છે. આ સિવાય કાશ્‍મીરના બાલ્‍ટિસ્‍તાન મુઝફ્‌ફરાબાદમાં તાપમાન માઈનસ ૯.૫ રહયું છે. મેદાનની વાત કરીએ તો પંજાબના આદમપુરમાં તાપમાન ૪ ડિગ્રીએ પહોંચી ગયું હતું જ્‍યારે હરિયાણાના નારનોલમાં તાપમાન ૫.૨ ડિગ્રી માપવામાં આવ્‍યું હતું.

હવામાન વિભાગના અપડેટ્‍સ અનુસાર, છેલ્લા ૨૪ કલાકમાં હિમાચલ પ્રદેશના મોટાભાગના વિસ્‍તારોમાં તાપમાન શૂન્‍યથી નીચે નોંધાયું છે. લાહૌલ-સ્‍પીતિના આદિવાસી વિસ્‍તાર તાબોમાં સૌથી ઓછું લઘુત્તમ તાપમાન -૧૦.૬ ડિગ્રી સેલ્‍સિયસ નોંધાયું હતું. કાઝામાં તાપમાન -૬.૯ ડિગ્રી હતું, જ્‍યારે કુકુમસેરીમાં -૮.૨ ડિગ્રી સેલ્‍સિયસ નોંધાયું હતું. IMD અનુસાર, કિન્‍નૌર જિલ્લાના રેકોંગ-પિયોમાં તાપમાન -૦.૯ ડિગ્રી સેલ્‍સિયસ નોંધાયું હતું.

મનાલીમાં પણ તાપમાન -૦.૩ ડિગ્રી સેલ્‍સિયસ રહ્‍યું. રાજ્‍યની રાજધાની શિમલામાં ૨.૦ ડિગ્રી સેલ્‍સિયસ જ્‍યારે કુફરી અને નારકંડામાં ૦.૧ ડિગ્રી સેલ્‍સિયસ અને -૨.૮ ડિગ્રી સેલ્‍સિયસ તાપમાન નોંધાયું હતું. કલ્‍પા, કિન્‍નૌરમાં તાપમાન -૪.૦ ડિગ્રી સેલ્‍સિયસ અને ધરમશાલામાં તાપમાન ૫.૦૨ ડિગ્રી સેલ્‍સિયસ નોંધાયું હતું.