હિમાચલ પ્રદેશમાં ચાલી રહેલી હિમવર્ષા અને વરસાદે પ્રવાસીઓને આકર્ષ્યા છે, ત્યારે મોટી સંખ્યામાં લોકોને તેના કારણે મુશ્કેલીનો સામનો કરવો પડી રહ્યો છે. મનાલીમાં સોલંગનાલા અને પાલચન વચ્ચે ભારે હિમવર્ષાને કારણે થયેલા જામને કારણે સેંકડો પ્રવાસીઓને રાતભર વાહનોમાં ફસાયેલા રહેવાની ફરજ પડી હતી. આગલા દિવસે બપોરથી શરૂ થયેલી આ સ્થિતિ આખી રાત ચાલુ રહી હતી.

પ્રવાસીઓ બરફનો આનંદ માણવા માટે મોટી અપેક્ષાઓ સાથે મનાલી આવ્યા હતા, પરંતુ હિમવર્ષાના કારણે ટ્રાફિક જામની સમસ્યામાં વધારો થયો હતો. ગઈકાલે બપોરે બે વાગ્યાના સુમારે શરૂ થયેલા આ ટ્રાફિક જામમાં અટવાયેલા વાહનચાલકો અને પ્રવાસીઓને આખી રાત ભૂખ્યા-તરસ્યા તરસ્યા પોતાના વાહનોમાં જ રહેવું પડ્યું હતું. સોશિયલ મીડિયા પર વાયરલ થઈ રહેલા વીડિયોમાં ફસાયેલા પ્રવાસીઓ અને ડ્રાઈવરો મદદ માટે વિનંતી કરતા જોવા મળ્યા હતા.

વહીવટીતંત્રે તાત્કાલિક બચાવ કામગીરી શરૂ કરી હતી અને બરફ હટાવવા અને ટ્રાફિકને સુવ્યવસ્થિત કરવા માટે રાતભર પ્રયાસો કર્યા હતા. જો કે ભારે હિમવર્ષાના કારણે બચાવ કામગીરીમાં અવરોધ ઉભો થયો હતો. તેમ છતાં વહીવટીતંત્ર ઘણા વાહનોને સુરક્ષિત રીતે બહાર કાઢવામાં સફળ રહ્યું હતું. પરંતુ જામ એટલો લાંબો હતો કે સમગ્ર પરિસ્થિતિને સામાન્ય સ્થિતિમાં લાવવામાં સમય લાગી રહ્યો છે.

સ્થાનિક લોકો અને વાહનોમાં ફસાયેલા પ્રવાસીઓએ જણાવ્યું કે પરિસ્થિતિ ખૂબ જ ખરાબ છે. ઠંડી અને ભૂખના કારણે લોકો ખૂબ જ પરેશાન હતા. અનેક પ્રવાસીઓ અને વાહન ચાલકોને આખી રાત વાહનોમાં બેસી રહેવાની ફરજ પડી હતી. સવાર સુધીમાં કેટલાક પ્રવાસીઓ મનાલી પહોંચવામાં સફળ થયા, પરંતુ મોટી સંખ્યામાં લોકો હજુ પણ મુશ્કેલીમાં છે.

આ ઘટનાએ હિમાચલ પ્રદેશમાં હિમવર્ષા દરમિયાન પ્રવાસીઓની સુરક્ષા અને બહેતર વ્યવસ્થાપનની જરૂરિયાત પર સવાલો ઉભા કર્યા છે. વહીવટીતંત્રે લોકોને અપીલ કરી છે કે તેઓ હવામાનની સ્થિતિને ધ્યાનમાં રાખીને તેમના પ્રવાસનું આયોજન કરે. તેમજ શિયાળાની ઋતુમાં હિમવર્ષા દરમિયાન જરૂરી સાવચેતી રાખવાની સલાહ આપવામાં આવી છે.