નવી દિલ્હી GST કલેક્શનમાં વધારાનો ટ્રેન્ડ ચાલુ છે. ગયા ડિસેમ્બર મહિનામાં જીએસટી કલેક્શન રૂ. 1,76,857 કરોડ હતું, જે ડિસેમ્બર 2023ના મહિના કરતાં 7.3 ટકા વધુ છે. ડિસેમ્બર 2023માં 1.65 લાખ કરોડ રૂપિયાનો GST એકત્રિત કરવામાં આવ્યો હતો. ગયા વર્ષે નવેમ્બરમાં GST કલેક્શન 1.82 લાખ કરોડ રૂપિયા હતું.

નાણા મંત્રાલયના ડેટા અનુસાર, ગયા ડિસેમ્બરમાં CGST હેઠળ રૂ. 32,836 કરોડ, SGST હેઠળ રૂ. 40,499 કરોડ અને IGST હેઠળ રૂ. 91,221 કરોડ એકત્ર થયા હતા. સેસ હેઠળ રૂ. 12,301 કરોડ એકત્ર થયા હતા.

મંત્રાલયના જણાવ્યા અનુસાર, સ્થાનિક સ્તરે જીએસટી કલેક્શનમાં 8.4 ટકાનો વધારો થયો છે, જ્યારે આયાતને કારણે જીએસટી કલેક્શનમાં 3.9 ટકાનો વધારો નોંધવામાં આવ્યો છે. ગયા ડિસેમ્બરમાં રૂ. 22,490 કરોડનું રિફંડ આપવામાં આવ્યું હતું.

રિફંડ પછી, ડિસેમ્બરમાં GSTની ચોખ્ખી આવક રૂ. 1,54,366 કરોડ હતી, જે ડિસેમ્બર 2023 કરતાં 3.3 ટકા વધુ છે. ડિસેમ્બર 2023માં GSTની ચોખ્ખી આવક 1,49,409 કરોડ રૂપિયા હતી. ડેટા અનુસાર, પંજાબ, હરિયાણા અને રાજસ્થાનમાં જીએસટી કલેક્શનમાં વધારો ચાલુ નાણાકીય વર્ષ 2024-25ના એપ્રિલ-ડિસેમ્બરમાં બે આંકડામાં હતો.