ઓડિશાના ભુવનેશ્વરમાં બુધવારે 18મી પ્રવાસી ભારતીય દિવસ સંમેલન શરૂ થયું. આ ત્રણ દિવસીય કોન્ફરન્સ દરમિયાન ભારત અને વિદેશમાંથી પાંચ હજારથી વધુ પ્રતિનિધિઓ ભાગ લેશે. પ્રવાસી ભારતીય દિવસ પરિષદનો પ્રારંભ યુવા પ્રવાસી ભારતીય દિવસ કાર્યક્રમ સાથે થયો હતો. કોન્ફરન્સનું ઉદ્ઘાટન ઓડિશાના મુખ્યમંત્રી મોહન ચરણ માઝી અને ભારતીય વિદેશ મંત્રી એસ જયશંકર અને યુવા અને રમતગમતના મંત્રી મનસુખભાઈ  માંડવિયાએ કર્યું હતું

વડાપ્રધાન નરેન્દ્રભાઈ  મોદી ગુરુવારે પ્રવાસી ભારતીય દિવસ સંમેલનમાં ભાગ લેશે. રાષ્ટ્રપતિ દ્રૌપદી મુર્મુ શુક્રવારે સમાપન સત્રની અધ્યક્ષતા કરશે. રાષ્ટ્રપતિ મુર્મુ પ્રવાસી ભારતીય સન્માન સાથે વિવિધ ક્ષેત્રોમાં સિદ્ધિઓ હાંસલ કરનારા વિદેશી ભારતીય સમુદાયના સભ્યોનું પણ સન્માન કરશે. પ્રવાસી ભારતીય દિવસ સંમેલનના મુખ્ય અતિથિ તરીકે ત્રિનિદાદ અને ટોબેગોના પ્રમુખ ક્રિસ્ટીન કાર્લા કંગાલુ છે. તે કોન્ફરન્સને વર્ચ્યુઅલ રીતે સંબોધશે. આ કોન્ફરન્સની થીમ 'વિકસિત ભારતમાં વિદેશી ભારતીયોનું યોગદાન' છે. 

મુખ્ય સચિવ મનોજ આહુજાએ જણાવ્યું હતું કે ઓડિશા સરકાર 50 દેશોના એનઆરઆઈને રાજ્યની સમૃદ્ધ સંસ્કૃતિ અને વારસો દર્શાવવામાં કોઈ કસર છોડી રહી નથી. તેમણે કહ્યું, 'કોન્ફરન્સમાં આવનાર દરેક પ્રતિનિધિ ઓડિશા પર્યટનના રાજદૂતની ભૂમિકા ભજવશે અને અમને આશા છે કે રાજ્યની સમૃદ્ધ સંસ્કૃતિ અને વારસો વિવિધ દેશોના પ્રવાસીઓને આકર્ષશે.'