સુકમા તા.૯ :  છત્તીસગઢમાં સુરક્ષા દળો અને નક્સલવાદીઓ વચ્ચે વધુ એક અથડામણ નોંધાઈ છે. અત્યાર સુધીમાં કુખ્યાત નક્સલવાદી હિડમાની ગેંગના ત્રણ સભ્યો માર્યા ગયા હોવાના અહેવાલ છે. માર્યા ગયેલા નક્સલવાદીઓની સંખ્યા વધી શકે છે. સુકમા અને બીજાપુર જિલ્લાના સરહદી વિસ્તારમાં ડિસ્ટ્રિક્ટ રિઝર્વ ગાર્ડ (DRG), કોબ્રા બટાલિયન, સ્પેશિયલ ટાસ્ક ફોર્સ (STF) અને બંને જિલ્લાના CRPF જવાનોએ સંયુક્ત ઓપરેશનમાં આ કાર્યવાહી હાથ ધરી છે. નક્સલી બટાલિયન સાથે એન્કાઉન્ટર ચાલુ છે. જંગલમાં મોટી સંખ્યામાં સુરક્ષા દળો હાજર છે. ભાજપ જિલ્લા પ્રમુખે નક્સલવાદીઓ સામે કડક કાર્યવાહીની માંગ કરી છે તાજેતરમાં, બીજાપુર જિલ્લાના કુત્રુ વિસ્તારમાં નક્સલવાદીઓ દ્વારા કરવામાં આવેલા IED બ્લાસ્ટમાં આઠ ડિસ્ટ્રિક્ટ રિઝર્વ ગાર્ડ (DRG) સૈનિકો અને એક ડ્રાઈવર શહીદ થયા હતા. આ હૃદયદ્રાવક ઘટનાથી રાજ્યના લોકોમાં ઘેરા શોકની લાગણી ફેલાઈ છે. મુખ્યમંત્રી વિષ્ણુદેવ સાંઈ અને ગૃહમંત્રી વિજય શર્માએ આ કાયરતાપૂર્ણ હુમલાની સખત નિંદા કરી હતી અને શહીદ જવાનોને શ્રદ્ધાંજલિ આપી હતી. શોકગ્રસ્ત પરિવારોને સાંત્વના આપતા તેમણે આશ્વાસન આપ્યું કે રાજ્ય સરકાર નક્સલવાદીઓ સામે કડક કાર્યવાહી કરશે. ભાજપના જિલ્લા પ્રમુખ યિતારામ સાહુએ આ ઘટના અંગે ઊંડું દુઃખ વ્યક્ત કર્યું હતું. તેમણે કહ્યું કે, નક્સલવાદીઓનું આ કાયરતાપૂર્ણ કૃત્ય નિંદનીય છે. ભાજપ સરકાર તેમને વહેલી તકે કડક સજા આપે. આપણા બહાદુર સૈનિકોનું બલિદાન વ્યર્થ નહીં જાય, આ ઘટના ફરી એકવાર નક્સલ સમસ્યાની ગંભીરતાને ઉજાગર કરે છે અને સુરક્ષા દળો સામેના પડકારોને રેખાંકિત કરે છે. રાજ્યના લોકો શહીદ થયેલા જવાનોના બલિદાનને ક્યારેય ભૂલી શકશે નહીં.