નવી દિલ્હી : ભારત જેટલી ઝડપથી ડિજિટલ બની રહ્યું છે, તેટલી જ ઝડપથી દેશભરમાં સાયબર ફ્રોડના કેસ પણ વધી રહ્યા છે. રોજ નવી નવી ટેકનિકથી લોકોને હેકરો નિશાન બનાવી રહ્યા છે. આ દિવસોમાં UPIના નામે છેતરપિંડીના મામલા પણ ઝડપથી વધી રહ્યા છે. જો તમે પણ UPI દ્વારા ટ્રાન્ઝેક્શન કરો છો તો તમારે ખૂબ કાળજી રાખવાની જરૂર છે. એક મોટો વર્ગ ઓનલાઈન ટ્રાન્ઝેક્શન માટે UPI નો ઉપયોગ કરે છે. દેશભરમાં દરરોજ કરોડો UPI ટ્રાન્ઝેક્શન થઈ રહ્યા છે, જેના દ્વારા કરોડો રૂપિયાના ટ્રાન્ઝેક્શન થઈ રહ્યા છે.

દેશની સૌથી મોટી સરકારી બેંક - સ્ટેટ બેંક ઓફ ઈન્ડિયાએ એક ટેક્સ્ટ મેસેજ દ્વારા તેના ગ્રાહકોને ચેતવણી આપી છે અને સાવચેત રહેવાની અપીલ કરી છે. એસબીઆઈએ સંદેશમાં લખ્યું છે કે, “પ્રિય SBI ગ્રાહક, અણધારી જમા કરાવ્યા પછી તાત્કાલિક નાણાં ઉપાડવાની વિનંતીઓથી સાવધ રહો. ચકાસણી વિના કલેક્ટ UPI વિનંતીને મંજૂર કરશો નહીં.

ખરેખર, એપ સ્ટોર પર ઘણી નકલી UPI એપ્સ ઉપલબ્ધ થઈ ગઈ છે, જે બિલકુલ વાસ્તવિક UPI જેવી જ દેખાય છે. સાયબર ગુનેગારો આ નકલી એપ્સ દ્વારા તમારા નંબર પર ટ્રાન્ઝેક્શન કરશે અને તેનો સ્ક્રીનશોટ લેશે. આ પછી, તેઓ તમારી બેંકના નામ પર તમારા નંબર પર નકલી મેસેજ મોકલશે કે UPI દ્વારા તમારા ખાતામાં પૈસા આવી ગયા છે. હવે આ ગુનેગારો તમને સ્ક્રીનશોટ અને મેસેજ ટાંકીને ફોન કરશે અને કહેશે કે તેમણે UPI દ્વારા ભૂલથી તમારા નંબર પર પૈસા મોકલી દીધા છે. આ પછી તેઓ તમને તેમનો UPI નંબર આપશે અને શક્ય તેટલી વહેલી તકે પૈસા પાછા માંગશે. 

જો તમારી સાથે પણ આવું થાય છે તો સાવધાન થઈ જાવ. જો આવું થાય, તો સૌ પ્રથમ તમારે કોઈ ઉતાવળમાં પગલું ન ભરવું જોઈએ. હવે તમારે UPI સાથે લિંક થયેલ તમારું બેંક એકાઉન્ટ ચેક કરવું પડશે કે પૈસા ખરેખર તમારી પાસે આવ્યા છે કે નહીં. જો તમને પૈસા ન મળ્યા હોય તો સીધો સાયબર ક્રાઈમ હેલ્પલાઈન નંબર પર ફોન કરો અને ફરિયાદ નોંધાવો.