નવી દિલ્‍હી, તા.૧પઃ  સુપ્રીમ કોર્ટે દેશભરના કોર્ટ સંકુલ અને ટ્રિબ્‍યુનલમાં મહિલાઓ, વિશેષ રીતે દિવ્‍યાંગ વ્‍યક્‍તિઓ અને ટ્રાન્‍સજેન્‍ડર વ્‍યક્‍તિઓ માટે શૌચાલય સુવિધાઓના નિર્માણ અંગે એક મહત્‍વપૂર્ણ આદેશ પસાર કર્યો છે. આ નિર્ણય જસ્‍ટિસ જેબી પારડીવાલા અને જસ્‍ટિસ આર મહાદેવનની બેન્‍ચે આપ્‍યો છે.

સુપ્રીમ કોર્ટે રાજ્‍ય સરકારો અને કેન્‍દ્રશાસિત પ્રદેશોને શૌચાલયોના નિર્માણ, જાળવણી અને સફાઈ માટે પૂરતા ભંડોળ ફાળવવાનો નિર્દેશ આપ્‍યો છે. આ સુવિધાઓની સમીક્ષા કરવા માટે હાઇકોર્ટ દ્વારા સમયાંતરે એક સમિતિની રચના કરવામાં આવશે. કોર્ટે તમામ રાજ્‍ય સરકારો, કેન્‍દ્રશાસિત પ્રદેશો અને ઉચ્‍ચ અદાલતોને ચાર મહિનાની અંદર આ મામલે તેમના સ્‍ટેટસ રિપોર્ટ ફાઇલ કરવાનો નિર્દેશ આપ્‍યો છે.

જસ્‍ટિસ પારડીવાલાએ મૌખિક ચેતવણી આપી હતી કે જો આ નિર્દેશોનું પાલન નહીં કરવામાં આવે તો કોર્ટના તિરસ્‍કારની કાર્યવાહી શરૂ કરવામાં આવશે. નવેમ્‍બર ૨૦૨૪માં જ્‍યારે મામલો પેન્‍ડિંગ હતો અને સુનાવણી બાદ નિર્ણય આપવામાં આવ્‍યો છે. ઘણી અદાલતોમાં, મહિલા ન્‍યાયિક અધિકારીઓ માટે પણ ખાનગી શૌચાલયો ઉપલબ્‍ધ ન હોવાના મામલે સર્વોચ્‍ચ અદાલતે નારાજગી વ્‍યક્‍ત કરી છે. મહિલાઓ, વકીલો અને ન્‍યાયિક અધિકારીઓ માટે અલગ શૌચાલયની સુવિધા પૂરી પાડવી જોઈએ.

કોર્ટે કહ્યું કે મહિલા શૌચાલયોમાં સેનિટરી નેપકિન ડિસ્‍પેન્‍સરની સુવિધા પણ પૂરી પાડવી જોઈએ. આ સુવિધાઓની જાળવણી પર ખાસ ધ્‍યાન આપવું જોઈએ. કોર્ટે કહ્યું છે કે કડક પાલન સુનિશ્‍ચિત કરવા માટે નિર્ણયની નકલ તમામ રાજ્‍યો/કેન્‍દ્રશાસિત પ્રદેશોના મુખ્‍ય સચિવો અને ઉચ્‍ચ અદાલતોના રજિસ્‍ટ્રાર જનરલને મોકલવામાં આવે.