નવી દિલ્હી :કેન્દ્રીય માર્ગ પરિવહન અને ધોરીમાર્ગ મંત્રી નીતિન ગડકરીએ જણાવ્યું હતું કે નબળા રોડ બાંધકામને બિનજામીનપાત્ર ગુનો બનાવવો જોઈએ અને કોન્ટ્રાક્ટરો અને એન્જિનિયરોને અકસ્માતો માટે જવાબદાર ઠેરવીને જેલમાં મોકલી દેવા જોઈએ. તેમણે કહ્યું કે માર્ગ અકસ્માતમાં ભારત વિશ્વમાં નંબર વન છે.

ઇન્ડસ્ટ્રી બોડી કોન્ફેડરેશન ઓફ ઇન્ડિયન ઇન્ડસ્ટ્રી (CII) દ્વારા આયોજિત એક કાર્યક્રમને સંબોધતા નીતિન ગડકરીએ જણાવ્યું હતું કે ખામીયુક્ત રોડ બાંધકામને બિનજામીનપાત્ર ગુનો બનાવવો જોઈએ અને રોડ કોન્ટ્રાક્ટરો, કન્સેશનર અને એન્જિનિયરોને અકસ્માતો માટે જવાબદાર ઠેરવવા જોઈએ. કેન્દ્રીય મંત્રીએ માર્ગ અકસ્માતો પર પણ ઊંડી ચિંતા વ્યક્ત કરી હતી.

કેન્દ્રીય મંત્રીએ એમ પણ કહ્યું કે માર્ગ પરિવહન અને રાજમાર્ગ મંત્રાલયનું લક્ષ્ય 2030 સુધીમાં માર્ગ અકસ્માતોમાં થતા મૃત્યુને અડધો કરવાનો છે. મંત્રાલયના ડેટા અનુસાર, 2023માં દેશમાં પાંચ લાખ માર્ગ અકસ્માતો થયા હતા, જેના પરિણામે 1,72,000 લોકોના મોત થયા હતા. ગડકરીએ કહ્યું કે આમાંથી 66.4 ટકા અથવા 1,14,000 લોકો 18-45 વર્ષની વય જૂથના હતા, જ્યારે 10,000 બાળકો હતા.

નીતિન ગડકરીએ કહ્યું કે હેલ્મેટ ન પહેરવાને કારણે 55,000 લોકોના મોત થયા અને 30,000 લોકો સીટ બેલ્ટ ન પહેરવાના કારણે મૃત્યુ પામ્યા છે. મંત્રીએ એમ પણ કહ્યું કે હાઈવે મંત્રાલય હાઈવે પરના બ્લેક સ્પોટ (એક્સીડેન્ટ-પ્રોન સ્પોટ)ને ઠીક કરવા માટે 40,000 કરોડ રૂપિયા ખર્ચી રહ્યું છે. ગડકરીએ ઉદ્યોગ અને અન્ય સંબંધિત એકમોને દેશમાં ડ્રાઇવરોની તીવ્ર અછતને દૂર કરવા તાલીમ અને ફિટનેસ કેન્દ્રો સ્થાપવા સરકાર સાથે ભાગીદારી કરવા વિનંતી કરી છે.