મુંબઈ : અભિનેતા સૈફ અલી ખાનના બાંદ્રાના આવાસમાં ચોરીના ઇરાદે ઘૂસેલી વ્યક્તિએ અભિનેતા પર હુમલો કર્યો હતો. હુમલાખોર અભિનેતાના ઘરની અંદર બાળકોના રૂમમાં પ્રવેશવાનો પ્રયાસ કરી રહ્યો હતો જ્યારે તેમની નોકરાણીએ તેને જોયો. નોકરાણીએ જોરથી અવાજ કર્યો અને સૈફ અલી ખાનને બોલાવ્યો હતો.

અભિનેતા ત્યાં પહોંચ્યો અને તેને રોકવાનો પ્રયાસ કર્યો. હુમલાખોર પાસે છરી હતી જેનાથી તેણે અભિનેતા પર હુમલો કર્યો હતો. તેણે સૈફ પર છ વખત હુમલો કર્યો, જેમાંથી અભિનેતાને બે જગ્યાએ ઊંડી ઈજા થઈ હતી જ્યારે બાકીની ઈજાઓ નજીવી હતી. હાલમાં તેની સર્જરી થઈ છે અને હાલમાં તેને હોસ્પિટલમાં આઈસીયુમાં રાખવામાં આવ્યો છે. સૈફ હવે ખતરાની બહાર છે.

હવે સૈફની બહેન સબા પટૌડી જે મુંબઈમાં નહોતી, તેણે હવે હુમલા પર પ્રતિક્રિયા આપી છે. તેણે હુમલા અંગે દુઃખ વ્યક્ત કર્યું પણ સાથે સાથે પોતાના ભાઈ પર ગર્વ પણ વ્યક્ત કર્યો. અભિનેતા પરના હુમલાથી દરેક જણ ચોંકી ગયા છે અને બાંદ્રા જેવા વિસ્તારની સુરક્ષા વ્યવસ્થા પર પણ સવાલો ઉઠાવ્યા છે.

સબાએ ઈન્સ્ટાગ્રામ સ્ટોરીઝમાં લખ્યું, હું આઘાતમાં છું. આમાંથી બહાર આવવાની કોશિશ કરી રહી છું, પરંતુ ભાઈ તમારા પર ગર્વ છે. પરિવારની સંભાળ લેવી અને મુશ્કેલ સમયમાં સાથે ઊભા રહેવાથી અબાને ગર્વની લાગણી થશે. જલ્દી સ્વસ્થ થાઓ. ત્યાં રહેવાનું મન થાય છે, જલ્દી મળીશું. હંમેશા શુભકામનાઓ અને પ્રાર્થના. સબાએ આ પોસ્ટમાં સૈફ સાથે પોતાની બાળપણની તસવીર પણ શેર કરી છે.

સબાએ આગળ લખ્યું- મને ત્યાં ન હોવાની ઉણપ ખટકે છે. હું જલ્દી આવીને તમને મળીશ. હંમેશા તમારા માટે પ્રાર્થના. તમને ખૂબ પ્રેમ કરું છું. તમને જણાવી દઈએ કે સબા સૈફની નાની બહેન છે. બોલિવૂડનો રસ્તો પસંદ કરવાને બદલે તેણે જ્વેલરી ડિઝાઇનિંગમાં પોતાની કારકિર્દી બનાવી છે.

હાલ હુમલાખોરને શોધવા માટે 10 ટીમો બનાવવામાં આવી છે. તેની બિલ્ડિંગમાંથી અજાણ્યા વ્યક્તિના સીસીટીવી ફૂટેજ પણ બહાર પાડવામાં આવ્યા છે.