ન્યુજર્સી તા.૧૭ : અમેરિકાએ તેના H-1B વિઝા પ્રોગ્રામમાં શુક્રવાર, 17 જાન્યુઆરીથી મોટા ફેરફારો કર્યા છે. H-1B વિઝા વિશ્વભરના કુશળ વ્યાવસાયિકોને યુનાઇટેડ સ્ટેટ્સમાં રહેવા અને કામ કરવાની મંજૂરી આપે છે. ભારતીય પ્રોફેશનલ્સને આ H-1B વિઝાથી ઘણો ફાયદો થાય છે અને તેના કારણે લાખો ભારતીયો અમેરિકામાં કામ કરી રહ્યા છે. ચોક્કસ આ ફેરફારોની અસર ભારતીય વ્યાવસાયિકો પર પણ પડશે. અમેરિકાના આઉટગોઇંગ પ્રેસિડેન્ટ જો બિડેન દ્વારા અમેરિકાની ઇમિગ્રેશન પોલિસીમાં આ છેલ્લો સુધારો છે કારણ કે ડોનાલ્ડ ટ્રમ્પ 20 જાન્યુઆરીએ રાષ્ટ્રપતિ પદના શપથ લેવા જઇ રહ્યા છે. H-1B વિઝા યુનાઇટેડ સ્ટેટ્સ સિટિઝનશિપ એન્ડ ઇમિગ્રેશન સર્વિસિસ (USCIS) દ્વારા સંચાલિત થાય છે. વર્ષ 2023 માં, અમેરિકા દ્વારા જારી કરવામાં આવેલા તમામ H-1B વિઝાના લાભાર્થીઓમાંથી 70 ટકા વ્યાવસાયિક ભારતીયો હતા. એવું માનવામાં આવે છે કે નવા ફેરફારોથી ભારતીયોને ફાયદો થઈ શકે છે. H-1B વિઝાના નિયમોમાં આ ફેરફારો થશે કોઈપણ સંસ્થા દ્વારા દાખલ કરવામાં આવેલી H-1B વિઝા અરજીઓની સંખ્યા મર્યાદિત કરવા નિયમોમાં સુધારો કરવામાં આવ્યો છે જેથી દરેકને તક મળે. જે વિદ્યાર્થીઓ અમેરિકામાં અભ્યાસ કરી રહ્યા છે અને અમેરિકામાં કામ કરવા માગે છે તેમના માટે તેમના F-1 વિઝાને H-1B વિઝામાં કન્વર્ટ કરવાની પ્રક્રિયાને સરળ બનાવવામાં આવી છે. નવા નિયમો હેઠળ નિષ્ણાત વ્યવસાયમાં ફેરફાર કરવામાં આવ્યા છે. આ હેઠળ, લાયક જગ્યાઓ ભરવા માટે સ્નાતકની ડિગ્રીની જરૂર પડશે, પરંતુ કેટલાક કિસ્સાઓમાં તે છૂટછાટ આપી શકાય છે અને જો તેમની લાયકાત નોકરી સાથે સંબંધિત હોય તો નિષ્ણાત ડિગ્રી વિનાના લોકોને પણ પ્રાધાન્ય આપી શકાય છે. USCIS એ H-1B વિઝાના બેકલોગને દૂર કરવા પ્રક્રિયાને ઝડપી બનાવવાની જોગવાઈઓ કરી છે જેથી પાત્ર વ્યાવસાયિકોને H-1B વિઝા માટે વધુ રાહ જોવી ન પડે. એમ્પ્લોયરો માટે ફેરફારો વધુ લવચીક બનાવવામાં આવ્યા છે અને તેઓ તેમની જરૂરિયાતો અનુસાર ચોક્કસ વ્યાવસાયિકોને નોકરી પર રાખી શકશે. આ સિવાય કંપનીમાં હિસ્સો ધરાવતા ઉદ્યોગપતિઓ પણ H-1B વિઝા માટે પોતાની જાતે જ પિટિશન ફાઇલ કરી શકશે. નવા નિયમો હેઠળ, H-1B વિઝા ધારકોને પણ ઓચિંતી તપાસ કરવામાં આવશે અને જો નિરીક્ષણ દરમિયાન કોઈ ખામીઓ જોવા મળે છે, તો વિઝા પણ રદ થઈ શકે છે. ઉપરાંત, હવે H-1B વિઝા સાથે નવું અપડેટેડ ફોર્મ I-129 ભરવું ફરજિયાત રહેશે. તેનો હેતુ પ્રક્રિયાને સરળ બનાવવાનો છે. H-1B વિઝા ધારકો હવે તેમના દેશમાં પાછા ફર્યા વિના તેમના વિઝા રિન્યૂ કરી શકશે. આનાથી ભારતીય પ્રોફેશનલ્સને ઘણી મદદ મળવાની અપેક્ષા છે.