નવી દિલ્હી : દિલ્હીમાં 5 ફેબ્રુઆરીએ યોજાનારી વિધાનસભાની ચૂંટણી માટે તમામ કેન્દ્ર સરકારની કચેરીઓ અને ઔદ્યોગિક સંસ્થાઓ બંધ રહેશે. શુક્રવારે કર્મચારી મંત્રાલય દ્વારા જારી કરાયેલા આદેશમાં આ માહિતી સામે આવી છે. આ સંબંધમાં હાલની સૂચનાઓનો ઉલ્લેખ કરતા, એવું કહેવામાં આવ્યું હતું કે જો કર્મચારી મતદારક્ષેત્રનો રહેવાસી હોય, તે વિસ્તારમાં મતદાર તરીકે નોંધાયેલ હોય અને મતદારક્ષેત્રની બહાર સ્થિત કેન્દ્ર સરકારની સંસ્થા/ઔદ્યોગિક સંસ્થામાં કાર્યરત હોય, તો તે સ્પેશિયલ કેઝ્યુઅલ લીવનો લાભ મળશે

   દિલ્હી વિધાનસભા ચૂંટણી માટે 5મી ફેબ્રુઆરીએ મતદાન થશે અને પરિણામ 8મી ફેબ્રુઆરીએ જાહેર થશે. ચૂંટણી જંગ માટે સત્તારૂઢ આમ આદમી પાર્ટી અને ભારતીય જનતા પાર્ટી મતદારોને રીઝવવા માટે અનેક વચનો આપી રહી છે. પાર્ટીના ટોચના નેતાઓ તેમના પક્ષની જીત સુનિશ્ચિત કરવા માટે રેલીઓ દ્વારા મતદારોને સંબોધિત કરી રહ્યા છે. લગભગ તમામ પાર્ટીઓ પોતાના ઉમેદવારોના નામની જાહેરાત કરી રહી છે.

   દિલ્હી વિધાનસભાની ચૂંટણી માટે ગુરુવારે 500 ઉમેદવારોએ તેમના ઉમેદવારી પત્રો ભર્યા, જેનાથી 70 વિધાનસભા બેઠકો માટે ઉમેદવારી નોંધાવનાર કુલ ઉમેદવારોની સંખ્યા 841 થઈ ગઈ. દિલ્હીના મુખ્ય ચૂંટણી અધિકારી (CEO)એ આ માહિતી આપી. ઉમેદવારી નોંધાવનારાઓમાં આમ આદમી પાર્ટી (AAP)ના વરિષ્ઠ નેતાઓ અને ભૂતપૂર્વ પ્રધાનોનો સમાવેશ થાય છે.

  મનીષ સિસોદિયાએ જંગપુરા મતવિસ્તારથી, ગોપાલ રાય બાબરપુરથી અને સૌરભ ભારદ્વાજે ગ્રેટર કૈલાશ ક્ષેત્રથી ઉમેદવારી નોંધાવી હતી. કોંગ્રેસ નેતા સંદીપ દીક્ષિતે નવી દિલ્હી મતવિસ્તારમાંથી ઉમેદવારી નોંધાવી હતી, જ્યાં તેઓ AAPના રાષ્ટ્રીય કન્વીનર અરવિંદ કેજરીવાલને પડકારશે. AAPના ભૂતપૂર્વ કાઉન્સિલર તાહિર હુસૈને મુસ્તફાબાદ બેઠક પરથી ઓલ ઈન્ડિયા મજલિસ-એ-ઈત્તેહાદુલ મુસલમીન (AIMIM)ના ઉમેદવાર તરીકે ઉમેદવારી પત્ર ભર્યું.

   દિલ્હી વિધાનસભા તેમજ તમિલનાડુની ઈરોડ (પૂર્વ) અને ઉત્તર પ્રદેશની મિલ્કીપુર વિધાનસભા બેઠક માટે 5 ફેબ્રુઆરીએ પેટાચૂંટણી યોજાવાની છે. માર્ગદર્શિકાનો સંદર્ભ આપતા, ડિપાર્ટમેન્ટ ઓફ પર્સોનેલ એન્ડ ટ્રેનિંગ (DoPT) એ જણાવ્યું હતું કે, “અધિસૂચિત વિસ્તારોમાં જ્યાં રાજ્ય વિધાનસભાની ચૂંટણીઓ યોજાવાની છે ત્યાં ઔદ્યોગિક સંસ્થાઓ સહિત કેન્દ્ર સરકારની કચેરીઓ મતદાનના દિવસે બંધ રહેશે.

ડીઓપીટીએ જણાવ્યું હતું કે વિધાનસભા મતવિસ્તારની પેટાચૂંટણીના સંદર્ભમાં, મતદાનના દિવસે ખાસ આકસ્મિક રજા ફક્ત એવા કર્મચારીઓને જ આપવી જોઈએ જે સંબંધિત મતદારક્ષેત્રના વાસ્તવિક મતદારો હોય.