નવી દિલ્હી : પેટ્રોલ, ડીઝલ, સીએનજી અને ઇલેક્ટ્રિક વાહનો જોયા હશે, પરંતુ શું તમે ક્યારેય સોલાર ઇલેક્ટ્રિક કાર જોઈ છે ? ઓટો એક્સ્પો 2025માં Vayve Mobilityએ એક શાનદાર કાર લોન્ચ કરી છે જે સૌર ઉર્જાથી ચાલે છે. આ કારની ખાસ વાત એ છે કે તેને સૂર્યપ્રકાશ અને વીજળી બંનેનો ઉપયોગ કરીને ચલાવી શકાય છે.

ભારતમાં લોન્ચ થયેલી આ સૌર ઉર્જાથી ચાલતી કારની કિંમત 3.25 લાખ રૂપિયા (એક્સ-શોરૂમ) નક્કી કરવામાં આવી છે. આ કાર ત્રણ વેરિઅન્ટ, નોવા, સ્ટેલા અને વિગામાં લોન્ચ કરવામાં આવી છે.

જો તમે બેટરી રેન્ટલ પ્રોગ્રામ હેઠળ આ કાર ખરીદો છો, તો તમને આ કાર 3.25 લાખ રૂપિયામાં મળશે, જ્યારે જો તમે બેટરી સાથે આ કાર ખરીદો છો, તો આ કાર ખરીદવાની કિંમત 3.99 લાખ રૂપિયા (એક્સ-શોરૂમ) હશે.

આ કિંમતે આ કાર ફક્ત પ્રથમ 25,000 ગ્રાહકોને જ વેચવામાં આવશે. આનો અર્થ એ થયો કે કંપની આ લક્ષ્ય પ્રાપ્ત કરતાની સાથે જ આ કારની કિંમત પણ વધારી શકે છે.

સૌર ઉર્જાથી ચાલતી ઇલેક્ટ્રિક કારની ડ્રાઇવિંગ રેન્જ વિશે વાત કરીએ તો, આ કાર સિંગલ ચાર્જ પર 250 કિલોમીટર સુધીની રેન્જ આપે છે. આ કારને સૌર ઉર્જાનો ઉપયોગ કરીને વર્ષમાં 3000 કિમી સુધી ચલાવી શકાય છે.

Vayve મોબિલિટીએ દાવો કર્યો છે કે આ સૌર ઉર્જાથી ચાલતી ઇલેક્ટ્રિક કાર માત્ર 0.50 પૈસા પ્રતિ કિલોમીટરના ખર્ચે ચાલી શકે છે. તે સૌથી સસ્તી ઇલેક્ટ્રિક કાર બની ગઈ છે, જે ફક્ત 0.50 પૈસામાં એક કિલોમીટરનું અંતર કાપે છે