ટ્રમ્પના માસ ડિપોર્ટેશનના પ્લાનને પગલે મેક્સિકોએ બોર્ડર નજીકના શહેરમાં ઈમર્જન્સીની સ્થિતિ જાહેર કરી
મેક્સિકો બોર્ડરથી અમેરિકામાં સૌથી વધુ ઘુસણખોરી થાય છે, જેને પગલે ત્યાં માઈગ્રન્ટ્સની સંખ્યા વધવાની આશંકા વ્યક્ત કરવામાં આવી રહી છે
મેક્સિકો, તા.૨૧: અમેરિકાના પ્રમુખ ડોનાલ્ડ ટ્રમ્પ તેમના માસ ડિપોર્ટેશનના પ્લાનને અમલમાં મૂકવાની શકયતાને પગલે મેક્સિકો બોર્ડર નજીક આવેલા અમેરિકાના શહેરમાં સ્ટેટ ઓફ ઈમર્જન્સી જાહેર કરવામાં આવી છે. માસ ડિપોર્ટેશન શરૂ થતા જ માઈગ્રન્ટ્સનો પ્રવાહ વધવાની સંભવિત શકયતાને જોતા કેલિફોર્નિયાના સાન ડિયાગોની બોર્ડર પાર આવેલા ટીજુઆનાના માઈગ્રન્ટ શેલ્ટર્સ પર તકેદારી વધારી દેવાઈ છે. મેક્સિકોના બાજા કેલિફોર્નિયા રાજ્યના આ સરહદી શહેરમાં ૩૦ વધુ શેલ્ટર્સ આવેલા છે હોવાનું સ્થાનિક ઓથોરિટીએ જણાવ્યું હતું. માનવતાવાદી કાર્યકરો મુજબ, આ શેલ્ટર્સ ઘણા નાના છે અને અહીં અન્ય સુવિધાઓનો પણ અભાવ છે.
જાર્ડિયન ડે લાસ મેરિપોસાસ શેલ્ટરના ડિરેક્ટર સી જેમી મરિને સીએનએન સાથે વાત કરતા કહયું કે, ટ્રમ્પ દ્વારા માસ ડિપોર્ટેશન કરાશે તો અમેરિકા જઈ રહેલા અને ત્યાંથી ડિપોર્ટ કરવામાં આવનારા માઈગ્રન્ટ્સ માટે મુશ્કેલી ઊભી થશે. અન્ય એક શેલ્ટર માલિકના કહેવા મુજબ શેલ્ટર્સ માટે મોટો પડકાર એ છે કે શું થવાનું છે તે ખબર નથી.
ઉલ્લેખનીય છે કે, ડોનાલ્ડ ટ્રમ્પે અગાઉ જ જાહેર કર્યું હતું કે, તેમના શપથ લેતાની સાથે જ ઈલીગલ માઈગ્રન્ટ્સ પર મોટા પ્રમાણમાં રેડ પાડવામાં આવશે. જોકે, તેમનો પ્લાન લીક થઈ જતા હાલ પૂરતો માઈગ્રન્ટ્સ પર રેડનો પ્લાન પડતો મૂકાયો છે. પરંતુ એક વખત માસ ડિપોર્ટેશન શરૂ થશે પછી ટીજુઆનામાં માઈગ્રન્ટ્સના ધાડા ઉતરી પડવાની શકયતાને જોતા સ્થાનિક ઓથોરિટીએ ગત સપ્તાહે જ ઈમર્જન્સીની સ્થિતિની જાહેરાત કરી દીધી હતી.
સ્ટેટ ઓફ ઈમર્જન્સી એ એક પ્રકારનું વહીવટી પગલું છે, જેમાં જે શહેરમાં સ્ટેટ ઓફ ઈમર્જન્સી જાહેર કરાઈ હોય તેને ફંડ મેળવવા માટે જગ્યા ભાડે આપવાની મંજૂરી આપવામાં આવે છે તેમજ લીગલ સર્વિસીઝ, માણસો, સાધનો અને સપ્લાય માટે નાણા આપવામાં આવે છે.
એક માનવતાવાદી કાર્યકરના જણાવ્યા મુજબ, શેલ્ટર્સમાં માઈગ્રન્ટ્સને બેડ અને ખાવાનું આપવું જ પૂરતું નથી હોતું. તેમને માનસિક અને આધ્યાત્મિક રીતે મદદ કરવાની હોય છે. તેમજ મેડિકલ સેવાઓ પણ પૂરી પડવાની હોય છે. હાલમા ટીજુઆનામાં કેટલા માઈગ્રન્ટ્સ છે તેને સ્પષ્ટ નથી. સરકારના આંકડા મુજબ, જાન્યુઆરી ૨૦૨૪થી ઓગસ્ટ ૨૦૨૪ દરમિયાન ૩૦,૦૦૦ કરતા વધુ માઈગ્રન્ટ્સ શહેરમાં હતા.
ઉલ્લેખનીય છે કે, મેક્સિકો બોર્ડરથી અમેરિકામાં સૌથી વધુ ઘુસણખોરી થાય છે. મેક્સિકો બોર્ડરથી અમેરિકામાં લોકોને ઘુસાડવા માટે ઘણા એજન્ટો કામ કરે છે. જોકે, અમેરિકામાં ઘુસતા પહેલા લોકોને મેક્સિકોમાં અમેરિકાની બોર્ડર નજીક શેલ્ટર હાઉસમાં રાખવામાં આવે છે અને પછી તક મળતા તેમને અમેરિકામાં ઘુસાડવામાં આવે છે. અમેરિકાની બોર્ડર નજીક આવેલા મેક્સિકોના શહેરો અને ગામોમાં માઈગ્રન્ટ્સને રૂપિયા લઈને રહેવા દેવાનો રીતસરનો ધંધો ચાલતો હોવાનું કહેવાય છે
(11:29 AM IST)
છેલ્લા 8 દિવસમાં સૌથી લોકપ્રિય 
