ઈઝરાયેલ અને હમાસ વચ્ચે યુદ્ધવિરામને લઈને ઈઝરાયેલના ટોચના કમાન્ડર લેફ્ટનન્ટ જનરલ હરઝી હલેવીએ પોતાના પદ પરથી રાજીનામું આપી દીધું છે. અહેવાલો અનુસાર, તેઓ યુદ્ધવિરામથી દુખી હતા. તેમનું કહેવું છે કે હમાસને સંપૂર્ણપણે ખતમ કરવાનો સંકલ્પ પૂરો થયો નથી. જ્યારે હમાસના હુમલાને રોકી શકાયો નથી.   ઈઝરાયલના વડાપ્રધાન બેન્જામિન નેતન્યાહૂએ પણ ઘણી વખત કહ્યું હતું કે જ્યાં સુધી હમાસનો સંપૂર્ણ નાશ નહીં થાય ત્યાં સુધી આ યુદ્ધ અટકશે નહીં. જોકે, ગાઝામાં રવિવારે યુદ્ધવિરામ થયો હતો. આ પછી ઈઝરાયેલ અને હમાસ બંનેએ બંધકોને મુક્ત કર્યા છે.

હાલેવીએ તાજેતરમાં એક નિવેદનમાં કહ્યું હતું કે 7 ઓક્ટોબરે હમાસના હુમલાને રોકવામાં નિષ્ફળતાથી તે ખૂબ જ દુખી છે. તેણે કહ્યું હતું કે ટૂંક સમયમાં તે કોઈ સક્ષમ વ્યક્તિને તેની જવાબદારી સોંપવાનું વિચારશે. 15 મહિના પહેલા હમાસે ઈઝરાયેલ પર અચાનક હુમલો કર્યો હતો જેમાં ઓછામાં ઓછા 1200 લોકોએ જીવ ગુમાવ્યા હતા અને 100 લોકોને બંધક બનાવ્યા હતા. ઈઝરાયેલે ગાઝા પટ્ટી પર હુમલો કરીને 46 હજાર પેલેસ્ટાઈનીઓને મોતને ઘાટ ઉતાર્યા છે. 

ઇઝરાયેલ અને હમાસ વચ્ચેના યુદ્ધવિરામ કરાર હેઠળ હમાસે પ્રથમ તબક્કામાં ત્રણ મહિલા બંધકોને મુક્ત કર્યા છે. બદલામાં, ઇઝરાયેલે 90 મહિલા બંધકોને મુક્ત કર્યા છે. હાલમાં 33 બંધકોને મુક્ત કરવા માટે હમાસ સાથે ડીલ કરવામાં આવી છે. બંધકોની આ સંખ્યા 6 અઠવાડિયાની અંદર મુક્ત કરવામાં આવશે. આ પછી બીજા તબક્કાની ડીલ થશે. બીજી તરફ ટ્રકોને ગાઝા પટ્ટીમાં સહાય પહોંચાડવાની મંજૂરી આપવામાં આવી છે.

  નોંધનીય છે કે આ મુક્તિ ઇઝરાયેલ અને હમાસ વચ્ચે બંધકોને એકબીજાને સોંપવાના કરારનો એક ભાગ છે. પેલેસ્ટિનિયન મહિલા કેદીઓની મુક્તિને ઇઝરાયેલ તરફથી એક મહત્વપૂર્ણ પગલું માનવામાં આવી રહ્યું છે, જે પેલેસ્ટિનિયન અને ઇઝરાયેલ પક્ષો વચ્ચેની તંગ પરિસ્થિતિને અમુક અંશે ઘટાડી શકે છે.