નવી દિલ્હી :ઈન્ડિગો ફ્લાઈટ (6E 5008)એ સાંજે 7:25 વાગ્યે દિલ્હી એરપોર્ટથી પટના માટે ઉડાન ભરી પરંતુ પટના એરપોર્ટ પર લેન્ડ થઈ શકી નહીં. પટનાના આકાશમાં લગભગ 9 ચક્કર લગાવ્યા બાદ ફ્લાઈટ દિલ્હી પરત ફરી છે. પ્લેન પટના એરપોર્ટ પર કેમ ઉતરી શક્યું નથી તે હજુ સુધી જાણી શકાયું નથી. બીજી ફ્લાઇટ, જે મુંબઈથી પટના જતી હતી, તેને પણ ડાયવર્ટ કરવામાં આવી છે

   ઈન્ડિગોએ કહ્યું છે કે, અમારો ઉદ્દેશ્ય હંમેશા અમારા ગ્રાહકોને તેમના ગંતવ્ય સ્થાન પર સમયસર પહોંચવાનો છે. જો કે, કેટલીકવાર અણધાર્યા સંજોગો ઉભા થાય છે. તપાસ મુજબ, પટનામાં ખરાબ હવામાનને કારણે ફ્લાઇટને લખનૌ તરફ વાળવામાં આવી છે, જે અમારા નિયંત્રણની બહાર છે.

   આ મહિને દુબઈથી આવી રહેલી એર ઈન્ડિયા એક્સપ્રેસ ફ્લાઈટમાં ટેકનિકલ ખામી સર્જાઈ હતી. આ પછી તેને કેરળના મલપ્પુરમ જિલ્લાના કરીપુર એરપોર્ટ પર લેન્ડ કરવામાં આવ્યું હતું. ફ્લાઈટની હાઈડ્રોલિક સિસ્ટમમાં ખામી સર્જાઈ હતી. આ પછી ફ્લાઈટને લેન્ડ કરવામાં આવી હતી. અગાઉ એરપોર્ટ પર ઈમરજન્સી જાહેર કરવામાં આવી હતી. આ ફ્લાઈટમાં 182 મુસાફરો અને 6 ક્રૂ મેમ્બર હતા.

ડિસેમ્બરની શરૂઆતમાં, જ્યારે મુંબઈથી ઈસ્તાંબુલ જતી ઈન્ડિગોની ફ્લાઈટ રદ કરવામાં આવી ત્યારે મુંબઈ એરપોર્ટ પર મુસાફરોને મુશ્કેલીનો સામનો કરવો પડ્યો હતો. લગભગ 100 મુસાફરો આઠ કલાક સુધી ફ્લાઈટમાં અટવાયા હતા. મુસાફરોએ આરોપ લગાવ્યો હતો કે તેમને ન તો ખાવાનું આપવામાં આવ્યું હતું કે ન તો પાણી.

મુસાફરોએ જણાવ્યું હતું કે તેમની ફ્લાઇટ સવારે 6:55 વાગ્યે મુંબઈથી ઇસ્તંબુલ જવાની હતી પરંતુ વિલંબ થયો હતો. આ અંગે તેઓને જાણ કરવામાં આવી ન હતી. કેટલાક કલાકો સુધી પ્લેનમાં રાખવામાં આવ્યા હતા. સ્ટાફના સભ્યો દ્વારા કોઈ માહિતી આપવામાં આવી ન હતી. પૂછપરછ પર, તેમને વિલંબ વિશે જાણ કરવામાં આવી હતી.