<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Tuesday, 28th January 2025

કેજરીવાલ પર ચૂંટણી પ્રચાર પર પ્રતિબંધ મુકો : નિર્મલા સીતારમણે કરી ચૂંટણી પંચ પાસે માંગ

અરવિંદ કેજરીવાલના નિવેદને રાજકીય હલચલ મચાવી દીધી:યમુનામાં ઝેર ભેળવવાનો આરોપ લગાવ્યો: ભાજપ અને કોંગ્રેસે ચૂંટણી પંચનો સંપર્ક કર્યો

નવી દિલ્હી :દિલ્હી વિધાનસભાની ચૂંટણી નજીક આવી રહી છે તેમ તેમ રાજધાનીમાં રાજકીય તાપમાન વધી રહ્યું છે. અરવિંદ કેજરીવાલના એ નિવેદનને લઈને હોબાળો થયો છે જેમાં તેમણે યમુનામાં ઝેર ભેળવવાનો દાવો કર્યો હતો. તેમના નિવેદન બાદ ભાજપ જ નહીં કોંગ્રેસે પણ ચૂંટણી પંચનો સંપર્ક કર્યો હતો અને પૂર્વ સીએમ સામે કાર્યવાહીની માંગ કરી હતી. ભાજપ વતી ચૂંટણી કમિશનરને મળવા આવેલા નિર્મલા સીતારમણે કેજરીવાલના ચૂંટણી પ્રચાર પર પ્રતિબંધ મૂકવાની માંગ કરી હતી.

 

બીજેપી નેતા અને કેન્દ્રીય નાણામંત્રી નિર્મલા સીતારમણે માંગ કરી હતી કે અરવિંદ કેજરીવાલને પ્રચાર કરતા રોકવા જોઈએ. ચૂંટણી કમિશનર પાસે ફરિયાદ લઈને પહોંચેલા બીજેપી પ્રતિનિધિમંડળનો ભાગ રહેલા સીતારમણે કહ્યું કે કેજરીવાલે આદર્શ આચાર સંહિતાનું ઉલ્લંઘન કર્યું છે. આ ભારતના સંઘીય માળખા માટે અને ચૂંટણી પ્રક્રિયા માટે પણ ખતરનાક છે.

 

  નિર્મલા સીતારમણે વધુમાં કહ્યું કે અરવિંદ કેજરીવાલે પોતાને અરાજકતાવાદી ગણાવ્યા, પરંતુ શું આ ચૂંટણી લોકશાહી માટે યોગ્ય છે? ચૂંટણી પંચે અમારી ફરિયાદો સાંભળી. એક પૂર્વ મુખ્યમંત્રી બીજા મુખ્યમંત્રી પર નરસંહારનો આરોપ કેવી રીતે લગાવી શકે? અરવિંદ કેજરીવાલનું આ બેજવાબદાર નિવેદન છે. તેમણે કહ્યું કે કેજરીવાલના શબ્દો હરિયાણાના લોકોનું અપમાન છે, જેમણે સીએમ સૈનીને ચૂંટ્યા છે.

 

આ પ્રતિનિધિમંડળમાં ભાજપના નેતા ભૂપિન્દર યાદવ અને હરિયાણાના સીએમ નાયબ સિંહ સૈની પણ સામેલ હતા. તેમણે કહ્યું કે ભાજપ જીત તરફ આગળ વધી રહી છે. ભૂપિન્દર યાદવે કહ્યું કે AAP ચીફ કેજરીવાલ હેબતાઈ ગયા છે. તેમણે ઝેરીલી રાજનીતિ કરી છે. AAP દિલ્હીમાં ઝેરીલી રાજનીતિ કરી રહી છે. તેમનું રાજકારણ નિષ્પક્ષ ચૂંટણી પ્રક્રિયા વિરુદ્ધ છે. અમે અરવિંદ કેજરીવાલનું ભાષણ રજૂ કર્યું છે, જેમાં તેમણે દાવો કર્યો છે કે પાણીમાં ઝેર ભેળવવામાં આવ્યું છે. આ કેજરીવાલની અરાજકતાવાદી રાજનીતિ છે.

 

કોંગ્રેસની લીગલ ટીમે પણ અરવિંદ કેજરીવાલ સામે કાર્યવાહી કરવાની માંગ કરી છે. કોંગ્રેસના કાનૂની વિભાગ (DPCC) એ કેજરીવાલના ઝેરીલા પાણી અંગેના નિવેદન પર ચૂંટણી પંચ પાસે તપાસની માંગ કરી છે. પાર્ટીની ટીમે માંગ કરી હતી કે જો આરોપો ખોટા હોવાનું જણાય તો કેજરીવાલ સામે કાર્યવાહી કરવામાં આવે. કોંગ્રેસે એવી પણ માગણી કરી હતી કે, 'યમુનામાં ઝેર છે તો ભાજપ સામે કાર્યવાહી થવી જોઈએ.' 

(8:17 PM IST)