નવી દિલ્હી તા.૩૦ :  સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયા (સેબી) એ બુધવારે ચાર સ્ટોક બ્રોકરોની નોંધણી રદ કરી દીધી છે. આ ચારમાં સિંગલ વિન્ડો સિક્યોરિટીઝ (Single Window Securities), સનનેસ કેપિટલ ઈન્ડિયા (Sunness Capital India), જીએસીએમ ટેક્નોલોજીસ (GACM Technologies) અને ઈન્ફોટેક પોર્ટફોલિયોનો (Infotech Portfolio) સમાવેશ થાય છે. આ પગલું ત્યારે લેવામાં આવ્યું જ્યારે જાણવા મળ્યું કે આ કંપનીઓ સેબીની રજીસ્ટ્રેશન માટેની જરૂરિયાતોને પૂર્ણ કરવામાં નિષ્ફળ રહી છે. સેબીએ ચાર અલગ-અલગ આદેશોમાં જણાવ્યું હતું કે આ કંપનીઓના રજિસ્ટ્રેશન સર્ટિફિકેટ રદ કરવાનું મુખ્ય કારણ એ છે કે તેઓ માન્ય સ્ટોક એક્સચેન્જના સભ્યો નથી, જેના કારણે રોકાણકારોને છેતરપિંડીનું જોખમ રહેલું છે.

પીટીઆઈના અહેવાલ મુજબ, સેબીએ સ્પષ્ટતા કરી હતી કે રજીસ્ટ્રેશન રદ કરવા છતાં, આ કંપનીઓ તેમના દ્વારા કરવામાં આવેલી કોઈપણ ખોટી કાર્યવાહી અથવા ચૂક માટે જવાબદાર રહેશે. ઉપરાંત, તેઓએ સેબીને બાકી ફી, બાકી રકમ અને વ્યાજ ચૂકવવાનું રહેશે. સેબીના જણાવ્યા અનુસાર, આ બ્રોકરોને અમુક શરતો સાથે રજીસ્ટ્રેશન આપવામાં આવ્યું હતું, જેમાં તેઓ માન્ય સ્ટોક એક્સચેન્જના સભ્યો તરીકે રહે તે પણ સામેલ હતી.

આ બ્રોકર્સે શું ખોટું કર્યું?

જો કે, આ કંપનીઓ હવે કોઈપણ સ્ટોક એક્સચેન્જની સભ્ય નથી, જેના કારણે તેઓ બ્રોકર્સ રેગ્યુલેશન, 1992 હેઠળ નિર્ધારિત શરતોને પૂર્ણ કરવામાં નિષ્ફળ રહી છે. આ નિયમન અનુસાર, સ્ટોક બ્રોકર્સ માટે માન્ય સ્ટોક એક્સચેન્જના સભ્ય હોવું ફરજિયાત છે. સેબીએ એ પણ માહિતી આપી હતી કે સ્ટોક એક્સચેન્જ દ્વારા આ કંપનીઓને સભ્યપદમાંથી હાંકી કાઢવામાં આવી હતી અને આ માહિતી તેમને પહેલાથી જ પહોંચાડવામાં આવી હતી.

મધ્યસ્થી નિયમન, 2008 હેઠળ નિર્ધારિત પ્રક્રિયાઓને અનુસરીને સેબીએ આ સ્ટોક બ્રોકરોના રજીસ્ટ્રેશન રજીસ્ટ્રેશન રદ કર્યા છે. રોકાણકારોના હિતોનું રક્ષણ કરવા અને નાણાકીય બજારમાં પારદર્શિતા જાળવવા માટે આ પગલું લેવામાં આવ્યું છે. સેબીનો આ નિર્ણય એ સુનિશ્ચિત કરે છે કે માત્ર લાયક અને માન્ય બ્રોકર્સ જ રોકાણકારો સાથે કામ કરે.