ઈઝરાયેલના વડાપ્રધાન બેન્જામિન નેતન્યાહુ રાષ્ટ્રપતિ ડોનાલ્ડ ટ્રમ્પને મળવા માટે રવિવારે અમેરિકા જવા રવાના થયા હતા. ટ્રમ્પ દ્વારા મળવા માટે આમંત્રિત કરાયેલા તેઓ પ્રથમ વિદેશી નેતા છે.

વોશિંગ્ટનમાં નેતન્યાહૂ રાષ્ટ્રપતિ ટ્રમ્પ સાથે ગાઝાની સ્થિતિ અને દ્વિપક્ષીય સંબંધો વિશે વાત કરશે. અમેરિકા જતા પહેલા વડાપ્રધાન નેતન્યાહુએ સંરક્ષણ મંત્રાલયના મહાનિર્દેશક એયલ ઝમીરને નવા આર્મી ચીફ તરીકે નિયુક્ત કરવાની જાહેરાત કરી હતી.

નેતન્યાહુએ આ નિર્ણય રક્ષા મંત્રી ઈઝરાયેલ કાઝ સાથે ચર્ચા કર્યા બાદ લીધો હતો. જનરલ ઝમીર ટૂંક સમયમાં વર્તમાન આર્મી ચીફ હરઝી હલેવીનું સ્થાન લેશે.

જનરલ હલેવીએ તાજેતરમાં 7 ઓક્ટોબર, 2023ના રોજ ઇઝરાયેલ પર હમાસના હુમલામાં સૈન્યની શિથિલતાની જવાબદારી સ્વીકારીને રાજીનામું આપવાની જાહેરાત કરી હતી. હલેવીએ ગાઝામાં યુદ્ધવિરામની ઘોષણા બાદ આ જાહેરાત કરી હતી.

જમીર ઈઝરાયેલ આર્મીના નિવૃત્ત મેજર જનરલ છે. તેઓ 2018થી 2021 સુધી આર્મી સ્ટાફના ડેપ્યુટી ચીફ હતા. દરમિયાન કતારના વડાપ્રધાન શેખ મોહમ્મદ બિન અબ્દુલરહમાન અલ થાનીએ રવિવારે દોહામાં હમાસના નેતાઓ સાથે મુલાકાત કરી હતી.

આ બેઠકમાં ગાઝામાં યુદ્ધવિરામના બીજા તબક્કાની ચર્ચા થઈ હતી પરંતુ પેલેસ્ટાઈન સંગઠને તેમાં કોઈ નક્કર ઈરાદો વ્યક્ત કર્યો નથી.

ગાઝા બાદ હવે ઈઝરાયેલની સેના પેલેસ્ટાઈનના પ્રભુત્વવાળા વિસ્તાર વેસ્ટ બેંક પર હુમલો કરી રહી છે. ઓપરેશનના 13મા દિવસે રવિવારે ઈઝરાયેલી સેનાએ ઉત્તરી સમરિયા વિસ્તારમાં ત્રણ હવાઈ હુમલા કર્યા હતા.

ઈઝરાયેલની સેનાએ કહ્યું છે કે પશ્ચિમ કાંઠામાં આતંકવાદી ઠેકાણાઓને નિશાન બનાવવામાં આવી રહ્યા છે. તાજેતરના હુમલામાં બે આતંકવાદીઓ માર્યા ગયા હોવાના અહેવાલ છે. જેનિનમાં પણ ઈઝરાયેલના હવાઈ હુમલાના સમાચાર છે. સેનાને તામુન ગામમાં દરોડામાં કેટલાક હથિયારો અને દારૂગોળો મળી આવ્યો છે.