મુંબઈ :બોલિવૂડ અભિનેતા સોનુ સૂદ મુશ્કેલીમાં મુકાઈ ગયો હોય તેવું લાગે છે. પંજાબના લુધિયાણાના જ્યુડિશિયલ મેજિસ્ટ્રેટ રમણપ્રીત કૌરે સોનુ વિરુદ્ધ ધરપકડ વોરંટ જારી કર્યું છે. કોર્ટમાં જુબાની આપવા માટે વારંવાર સમન્સ મોકલવામાં આવ્યા છતાં સોનુ સૂદ કોર્ટમાં હાજર ન થવાને કારણે આ વોરંટ જારી કરવામાં આવ્યું છે.

આ કેસમાં, લુધિયાણા સ્થિત વકીલ રાજેશ ખન્નાએ મોહિત શુક્લા નામના વ્યક્તિ વિરુદ્ધ 10 લાખ રૂપિયાનો છેતરપિંડીનો કેસ દાખલ કર્યો છે, જેમાં તેને નકલી રિજિકા સિક્કાઓમાં રોકાણ કરવાની લાલચ આપવામાં આવી હતી. આ ફરિયાદમાં રાજેશે ઘણા ગંભીર આરોપો લગાવ્યા છે. તેમણે છેતરપિંડીનો આરોપ લગાવ્યો છે.

આ ફરિયાદને કારણે, ખન્નાએ સોનુ સૂદને જુબાની આપવા માટે કોર્ટમાં સમન્સ પાઠવ્યું હતું. જોકે, વારંવાર સમન્સ પાઠવવા છતાં, સોનુ સૂદ કોર્ટમાં જુબાની આપવા માટે હાજર થયો ન હતો. તેમની ગેરહાજરીને કારણે કોર્ટે હવે તેમની સામે ધરપકડ વોરંટ જારી કર્યું છે.

આ વોરંટ મુંબઈના અંધેરી પશ્ચિમ સ્થિત ઓશિવારા પોલીસ સ્ટેશનને મોકલવામાં આવ્યો છે. આમાં, તેમને અભિનેતાની ધરપકડ કરીને કોર્ટમાં રજૂ કરવાનો નિર્દેશ આપવામાં આવ્યો છે. આ કેસની આગામી સુનાવણી 10 ફેબ્રુઆરીએ થશે. સોનુ સૂદે કહ્યું કે હું કોઈ પણ વસ્તુનો બ્રાન્ડ એમ્બેસેડર નથી, મેં મારા વકીલ દ્વારા જવાબ આપી દીધો છે. હું ૧૦ ફેબ્રુઆરીએ ફરી આપીશ. હું ફક્ત એટલું જ કહેવા માંગુ છું કે હું કોઈ પણ વસ્તુનો બ્રાન્ડ એમ્બેસેડર નથી. મને આ બધું ખબર પણ નથી, મારે તેની સાથે કોઈ લેવાદેવા નથી. તેઓ ફક્ત આ બાબતમાં પ્રસિદ્ધિ મેળવવા માંગે છે, તેથી જ તેઓ આવી હરકતો કરી રહ્યા છે.