જેરુસલેમ. ઇઝરાયલ અને હમાસ વચ્ચે ફરી એકવાર સંઘર્ષ શરૂ થઈ શકે છે. રાષ્ટ્રપતિ ડોનાલ્ડ ટ્રમ્પની ચેતવણી બાદ, વડા પ્રધાન નેતન્યાહૂએ મંગળવારે ધમકી આપી હતી કે જો આ અઠવાડિયાના અંત સુધીમાં કોઈ બંધકોને મુક્ત કરવામાં નહીં આવે તો ગાઝામાં ભીષણ લડાઈ ફરી શરૂ કરવામાં આવશે. બંધકોને મુક્ત કરવાનો હમાસનો ઇનકાર યુદ્ધવિરામ કરારને તણાવપૂર્ણ બનાવી રહ્યો છે.

ઇઝરાયલી વડા પ્રધાન બેન્જામિન નેતન્યાહૂએ કહ્યું કે જો હમાસ શનિવારે બપોર સુધીમાં અમારા બંધકોને પરત નહીં કરે, તો યુદ્ધવિરામ સમાપ્ત થઈ જશે, અને IDF (ઇઝરાયલી સેના) હમાસને નિર્ણાયક રીતે પરાજિત ન કરે ત્યાં સુધી તીવ્ર લડાઈ ચાલુ રાખશે. પરંતુ તાજેતરના દિવસોમાં યુદ્ધવિરામ કરાર પર તણાવ વધ્યો છે, જેના કારણે તેને બચાવવા માટે રાજદ્વારી પ્રયાસો વધુ તીવ્ર બન્યા છે.

   અમેરિકાના રાષ્ટ્રપતિ ડોનાલ્ડ ટ્રમ્પે ગાઝામાં બંધક બનાવેલા લોકો અંગે હમાસને અલ્ટીમેટમ આપ્યું છે. તેમણે હમાસને ચેતવણી આપી હતી કે જો ગાઝામાં બાકીના બંધકોને શનિવાર બપોર સુધીમાં મુક્ત કરવામાં નહીં આવે તો વિનાશ સર્જાશે. જ્યારે હમાસે ટ્રમ્પની ચેતવણીને નકારી કાઢી હતી અને કહ્યું હતું કે બાકીના બંધકોને ત્યારે જ મુક્ત કરવામાં આવશે જ્યારે બધા પક્ષો યુદ્ધવિરામનું સન્માન કરશે. અગાઉ, હમાસે ઇઝરાયલ પર યુદ્ધવિરામ કરારનું ઉલ્લંઘન કરવાનો આરોપ લગાવ્યો હતો અને કહ્યું હતું કે વધુ બંધકોને મુક્ત કરવામાં વિલંબ થશે

 19 જાન્યુઆરીએ ઇઝરાયલ અને હમાસ વચ્ચે યુદ્ધવિરામ અને બંધકોને મુક્ત કરવા અંગે એક કરાર થયો હતો. આ કરાર હેઠળ, હમાસ ધીમે ધીમે બંધકોને મુક્ત કરી રહ્યું છે અને બદલામાં ઇઝરાયલ પેલેસ્ટિનિયન કેદીઓને મુક્ત કરી રહ્યું છે.સોમવારે વ્હાઇટ હાઉસના ઓવલ ઓફિસમાં પત્રકારોને યુએસ રાષ્ટ્રપતિએ જણાવ્યું હતું કે હમાસે શનિવારે બપોરે 12 વાગ્યા સુધીમાં ગાઝામાં બાકી રહેલા તમામ બંધકોને મુક્ત કરવા જોઈએ. જો તેમ નહીં થાય, તો તે ઇઝરાયલ-હમાસ યુદ્ધવિરામ રદ કરવાનો પ્રસ્તાવ મૂકશે, અને તેના પછી આપત્તિ આવશે. તેમણે કહ્યું કે ઇઝરાયલ આ મુદ્દા પર તેમના મંતવ્યોને અવગણી શકે છે. તેઓ આ મુદ્દે ઇઝરાયલી વડા પ્રધાન બેન્જામિન નેતન્યાહૂ સાથે વાત કરી શકે છે.